湊B總有沮喪時 媽媽只想要5樣嘢

即使「為母則強」，但媽媽都有軟弱嘅時候。湊B生活未必一切順利，媽媽總會遇到困難同挑戰，令情緒低落甚至崩潰。當媽媽沮喪時，其實要求好簡單，只係想要以下5樣嘢。媽媽唔係鐵人，有情緒亦好正常，千祈唔好質疑自己，冷靜過後又可以繼續湊B。

1. 一個擁抱

有時一個動作比起千言萬語來得更有力，如果老公或者熟悉嘅親人可以畀媽媽一個擁抱，對媽媽嚟講已經係好好嘅安慰。呢個擁抱好似話畀媽媽聽：辛苦你喇，你嘅委屈我都知道。

2. 一個可以呻嘅對象

媽媽唔開心、心裡面有委屈真係不吐不快，如果有個人可以畀媽媽呻下，即使冇咩實際幫助，媽媽講咗出嚟點都舒服啲。好似同身邊嘅媽媽朋友傾吓，原來對方都曾經有類似嘅遭遇，大家更有共鳴。否則屈埋屈埋，媽媽隨時大爆發。

3. 一個獨處冷靜嘅時間

人人都有情緒，面對湊B壓力，媽媽都有身心疲倦嘅時候，呢個時候佢只希望有少少時間畀自己冷靜一下，有一個喘息嘅空間，即使入房一陣都好，媽媽冷靜完好快又重新振作。

4. 一個大吃大喝嘅機會

食嘢令人心情變好，如果媽媽可以食到好味嘅嘢，或者食到自己鍾意嘅嘢，滿足咗食慾後精神大增，湊B鬥志會番晒嚟。

5. 一個實際嘅幫助

媽媽湊B有幾攰可想而知，如果老公或親人可以幫手湊B，莫講話畀媽媽放假，有少少時間抖一抖，放鬆心情已經好好。

Text: Mami Editorial

Photo Source: Pinterest