天氣轉涼 媽媽要為BB預備嘅4件事

最近天氣開始轉涼，冷峰到又會令氣溫再低啲，媽媽為BB預備好由秋涼進入冬天未？一轉天氣BB好容易病，唔小心冷親就弊，BB病唔單止佢辛苦，爸爸媽媽照顧佢都好攰。只要做好以下4件事，媽媽就唔使咁擔心。

1. 執好冬天衫

係時候睇下BB個衣櫃夠唔夠厚衫應付冬天，除咗長袖衫褲、冷衫、外套、大褸、羽絨，仲要有打底衫保暖，視乎天氣有幾凍，最好有唔同厚薄質地嘅冬天衫。BB皮膚咁嬌嫩，媽媽揀衫時要留意衫嘅質地，貼身衫最好係全棉質，令BB著得舒適。

2. 預備冬天被鋪

天氣轉涼，BB都要轉張冬被，張被唔夠暖，BB點瞓都會覺得寒寒地。如果天氣太凍，可以喺BB床加張毛氈被保暖，BB瞓喺上面自然暖笠笠。為防BB踢被冷親，可以幫BB著埋睡袋。

3. 入手保溫餐具

BB加固後，媽媽要為BB準備幾餐，但BB食得慢，冬天啲嘢食又好快凍，準備定保溫碗就可以保持食物溫度，BB唔使食冷飯。仲有，預備埋保溫杯，等BB可以飲暖水保暖。

4. 做好保濕護膚

冬天皮膚特別乾燥，BB嘅皮膚尤其容易敏感，媽媽要預備BB專用嘅護膚品，沖完涼幫BB全身搽，做好滋潤保濕，免得BB皮膚太乾爆拆。

Text: Mami Editorial

Photo Source: Pinterest