日日做到冇時停 全職媽媽希望出現嘅3個時刻

不論全職媽媽定在職媽媽，大家都努力照顧家庭同小朋友，冇話邊個辛苦啲或者冇咁辛苦。有人會覺得全職媽媽唔使返工，應該有好多時間，其實做全職媽媽可能辛苦過返工，呢份工冇糧出冇假放，一日24小時一星期7日隨時候命。相信全職媽媽都好期待以下3個時刻！

1. BB瞓咗

如果BB係黐身B，媽媽只能等到佢瞓咗，先有時間做其他嘢，爭取時間執屋、煮飯、洗衫、掃地⋯⋯總之就大把嘢等住做。搞掂晒啲正經事，或者等BB夜晚瞓咗先有私人時間，玩吓電話、上網、煲劇，放鬆一下準備第二日繼續做。

2. 老公放工

老公放工返屋企，叫做有個人分擔下湊BB或者家務嘅工作。如果老公係一個唔錯嘅丈夫同爸爸，佢嘅出現可以令媽媽如釋重負，心理壓力冇咁大，忙咗成日冇停過，唔使再一個人湊BB！

3. 約朋友出街

全職媽媽平日多數喺屋企湊BB，難得約咗朋友出街，老公或者屋企人可以幫手湊住BB。期待咗好耐，終於可以暫時放低BB，出去行吓街散吓心，同閨蜜傾到雞啄唔斷，仲可以趁機會訴苦。間中同朋友出街叉電，先可以繼續全職媽媽嘅枯燥生活。

Text: Mami Editorial

Photo Source: Pinterest