以為湊一個好辛苦 湊兩個先知湊一個嘅3大輕鬆事

新手媽媽由零開始湊小朋友，過程未必好順利，但跌跌撞撞總算慢慢上手，不單BB成長咗，媽媽都喺湊BB嘅學習中成長。媽媽湊第一個BB可以話身心俱疲，感覺前所未有嘅辛苦，但有兩個或以上小朋友嘅媽媽會話你知，其實湊一個係好輕鬆！

1. 偷到時間休息

湊一個小朋友當然唔係話好輕鬆，不過至少BB瞓咗覺之後，媽媽可以有私人時間，打理吓屋企或者自己休息吓。但有多過一個小朋友嘅媽媽，忙完一個接一個，要安頓好每個小朋友嘅起居飲食，好似一個瞓咗就要同另一個玩，除非咁幸運小朋友嘅作息時間都一致，否則媽媽全日基本上係冇時停。

2. 出街唔使帶咁多嘢

帶BB出街要預備好多BB用品，尿片、奶粉、奶樽、濕紙巾⋯⋯仲有好多立雜嘢，BB有咩需要隨時啲嘢可以攞上手。至於有多一個小朋友，要帶晒佢哋出街，相信媽媽袋要帶好多嘢。視乎小朋友嘅年紀，如果年紀差唔多，除咗要帶BB嘢，仲要帶大仔女嘅物品，好似餐具、外套（去冷氣地方必備）。加上，湊多個出街，細嘅要BB車或孭帶，大嘅要拖住，完全唔輕鬆。

3. 集中精力同體力

小朋友大啲父母需要同佢哋有更多互動，要花更多時間同佢咃玩。如果只有一個小朋友，佢可以獨霸父母，父母嘅精力同體力自然可以集中喺佢身上。但有兩個小朋友，父母需要兩倍精力同體力，三個小朋友付出嘅精力同體力係三倍⋯⋯

Text: Mami Editorial