【實測3種降溫方法】拆解嬰幼兒中暑徵兆與降溫急救步驟

炎炎夏日，小朋友進行戶外活動時容易因高溫而中暑 。唔少家長會準備冰毛巾、退熱貼及風扇幫孩子降溫，但大人覺得舒服嘅冰敷方法，未必適合體溫調節能力尚未成熟嘅嬰幼兒。到底嬰幼兒中暑徵兆係咩？BB面紅但無汗、尿片乾、頭暈、抽筋又代表甚麼？

#3種兒童降溫方法實測

今次小編分別測試冰毛巾、冰鎮退熱貼，以及噴水配合手提風扇。每種方法使用30秒，並以紅外線溫度槍量度局部皮膚表面溫度！

1｜冰毛巾敷面

• 測試位置：臉部
• 使用前：36.4°C
• 30秒後：28.9°C
• 局部表面降幅：7.5°C

冰毛巾帶來最明顯、最即時嘅冰涼感，局部皮膚表面溫度亦錄得最大跌幅。

2｜冰鎮退熱貼敷頸

• 測試位置：頸部
• 使用前：33.3°C
• 30秒後：27.2°C
• 局部表面降幅：6.1°C

經過冰鎮嘅退熱貼同樣令局部皮膚迅速變凍。

3｜噴水＋手提風扇

• 測試位置：手臂
• 使用前：35.1°C
• 30秒後：30.9°C
• 局部表面降幅：4.2°C

噴濕皮膚後配合搧風，可利用水分蒸發帶走皮膚表面熱力。雖然今次錄得嘅即時表面降幅不及冰毛巾，但冰涼刺激相對較低，係最適合作為小朋友日常溫和消暑方法！

常溫退熱貼又有冇用？

小編亦測試咗未經冰鎮嘅常溫退熱貼：

• 使用前：34.4°C
• 30秒後：34.1°C
• 即時表面降幅：0.3°C

30秒內錄得嘅溫度變化唔大，但退熱貼主要透過水凝膠提供持續局部清涼感，效果未能夠完全反映喺短短30秒嘅即時讀數上。

#皮膚降溫7.5°C＝體溫都降咗？

測試期間，小編以耳探量度，讀數維持約37.1°C至37.4°C，未有跟隨局部皮膚表面溫度大幅下降。換言之，冰毛巾接觸嘅皮膚可以瞬間變凍，但唔代表身體內部溫度同時下降相同幅度。

不過，耳探讀數亦會受量度位置、操作方法及儀器誤差影響，不能視為精確核心體溫。今次結果主要反映：局部皮膚摸落好凍，不等於全身體溫同步下降！

#小朋友日常消暑點做？

如果小朋友只係玩到滿頭大汗，精神、反應及飲水情況正常，未有出現熱衰竭或中暑警號，家長可以從以下幾方面幫助散熱：

1｜移到陰涼或有冷氣地方

先離開猛烈陽光及焗促環境，到樹蔭下、室內或有冷氣嘅地方休息，通常比單靠一件降溫用品更重要。

2｜解開多餘衣物

除去外套、帽或其他焗促衣物，保持衣物輕薄、寬鬆及透氣，讓皮膚更容易散熱。

3｜用水噴濕皮膚＋輕輕搧風

可以用涼水或常溫水輕輕噴濕手腳及皮膚，再配合風扇或手搧風，利用水分蒸發帶走熱力。家長應避免長時間將風扇近距離直吹嬰兒。

世界衞生組織亦建議，炎熱天氣下可以用濕布、噴水或濕衣物弄濕皮膚，協助身體保持涼爽。

4｜適量補充水分

較大嘅幼童可少量多次飲水；6個月以下嬰兒一般以增加母乳或配方奶餵哺次數補充水分，不應自行額外大量餵水。

5｜退熱貼只作局部舒緩

常溫退熱貼可提供額頭或其他指定位置嘅局部清涼感，但要按包裝標示嘅適用年齡及方法使用。幼兒使用時要由成人看管，避免移位遮住口鼻或被小朋友撕下放入口中。

如產品含薄荷腦、香料或其他涼感成分，應先查看適用年齡及警告；皮膚有傷口、濕疹或出現刺激反應時應停止使用。

6｜冰冷用品避免直接、長時間貼住皮膚

冰毛巾或冰袋並非任何情況下都不能使用，但唔應將冰塊或極凍物件直接、長時間壓住幼兒幼嫩皮膚，以免引起疼痛、寒顫或皮膚受損。如使用冷敷物，最好以毛巾包裹，並持續觀察皮膚及小朋友反應。

#1歲以下嬰兒過熱及脫水警號

嬰兒未懂得用說話表達不適，家長要留意飲奶、尿量、精神及身體反應：

• 尿量明顯減少，尿片比平日乾
• 尿液顏色變深
• 嘴唇或口腔乾燥
• 哭泣時眼淚減少
• 頭頂囟門明顯凹陷
• 拒絕飲奶或吸吮力變弱
• 異常煩躁、持續大哭
• 反常嗜睡、難以喚醒或四肢無力
• 呼吸或心跳明顯加快

囟門凹陷可能係脫水警號之一，但不能單靠囟門判斷嚴重程度，需要連同尿量、飲奶量及精神狀態一併觀察。

#1歲以上兒童過熱及熱衰竭警號

幼童可能會直接表示不舒服，亦可能只係突然出現反常行為：

• 頭暈、頭痛
• 非常口渴
• 噁心或嘔吐
• 大量出汗、面色蒼白或皮膚濕冷
• 手腳或腹部肌肉抽筋
• 突然疲倦、無力或拒絕行路
• 異常暴躁、哭鬧或反應變慢
• 呼吸或心跳加快

小朋友出汗多或少，都唔可以單獨用嚟排除中暑。即使仍然流汗，只要出現神志混亂、抽搐、失去知覺等情況，都可能係嚴重警號。

#懷疑熱衰竭應該點處理？

如果小朋友仍然清醒、有正常反應及可以自行飲水，但出現頭暈、頭痛、噁心、大量出汗或乏力等過熱徵兆，可立即採取以下措施：

1. 停止活動：帶小朋友離開高溫環境，移到陰涼、通風或有冷氣地方。
2. 解開衣物：除去多餘衣物，保持身體通爽。
3. 協助散熱：用涼水噴濕或擦拭皮膚，再配合搧風；亦可使用涼濕毛巾。
4. 補充水分：如果小朋友完全清醒而且能正常吞嚥，可少量多次補充水分；大量出汗後可按需要飲用適合兒童嘅電解質補充飲品。
5. 持續觀察：如果休息及降溫後未有改善、症狀惡化或家長有任何疑慮，應盡快求醫。

#3大常見降溫誤區

1｜以為皮膚越凍，身體退熱越快

冰毛巾可以令局部皮膚迅速變凍，但不能單靠表面溫度判斷全身體溫變化。

正確做法：日常消暑應同時移到陰涼地方、解開多餘衣物、噴水搧風及適量補充水分。

2｜用酒精擦身降溫

酒精可經皮膚或呼吸道被兒童吸收，引起中毒等風險，不應用作兒童降溫。

正確做法：改用水噴濕或擦拭皮膚，再配合搧風。

3｜中暑時餵退燒藥

中暑由環境高溫及身體散熱失效引起，並非一般感染性發燒。退燒藥不能解決中暑問題，亦可能增加身體負擔。

正確做法：立即求助並積極進行物理降溫。世界衞生組織亦提醒，中暑時不應使用阿士匹靈或撲熱息痛代替降溫及醫療處理。

#懷疑中暑：立即求助＋持續降溫

中暑屬醫療緊急狀況。如果小朋友出現以下任何一項，唔好等體溫升到40°C先行動：

• 神志不清、答非所問
• 反應異常遲鈍或難以喚醒
• 行路不穩、失去協調
• 抽搐或昏迷
• 呼吸異常急促
• 持續嘔吐，無法飲水
• 皮膚非常灼熱
• 體溫接近或超過40°C

應立即致電999，並在等候救援期間：

1. 將小朋友移到陰涼或有冷氣地方。
2. 除去多餘衣物。
3. 立即用可行方法持續降溫，例如以冷濕毛巾覆蓋或擦拭身體、噴水配合搧風。
4. 如有冰袋，可用毛巾包裹後放近頸側、腋下或腹股溝等位置，避免冰塊直接接觸皮膚。
5. 如果小朋友神志不清、正在嘔吐或不能正常吞嚥，不要強行餵水。
6. 如失去知覺但仍有呼吸，將其置於復原臥式並密切監察呼吸。

真正中暑時，重點係一邊召喚救援，一邊盡快利用現有方法降溫，唔應為咗尋找某一種「最完美」用品而延誤處理。世界衞生組織亦建議，懷疑中暑時可使用冷濕毛巾、冰袋及風扇等可行方法快速降溫。

#高溫天氣預防貼士

1. 出發前留意天文台天氣及酷熱天氣警告。
2. 避免在一日最炎熱及陽光最猛烈嘅時段進行戶外活動。
3. 選擇淺色、輕薄、寬鬆及透氣衣物。
4. 帶備足夠飲品，安排密密休息及補水。
5. 定時進入陰涼或有冷氣地方降溫。
6. 戶外活動時間應按氣溫、濕度、陽光、活動強度及孩子狀態調整，唔宜一刀切以30或45分鐘作安全上限。
7. 切勿用乾布完全遮蓋嬰兒車，以免阻礙空氣流通、令車內更加焗熱。
8. 無論車窗有冇打開，都絕對不能將兒童獨留於停泊車廂內。

嬰幼兒體溫調節及表達能力未成熟，炎熱天氣下需要成人更密切觀察。家長毋須單靠「摸落熱唔熱」判斷；小朋友嘅精神、反應、飲水、尿量及呼吸情況，往往更加重要。

衞生防護中心提醒，嬰幼兒屬較容易中暑人士；如出現頭暈、頭痛、噁心、氣促或神志不清等徵狀，應立即休息、求助並盡快求醫。

資料來源：香港衞生防護中心、世界衞生組織（WHO）、美國兒科學會HealthyChildren.org

本文內容只供一般健康資訊參考，不能代替醫生診斷或治療。如小朋友出現神志不清、抽搐或昏迷等情況，應立即致電999求助。

Text:mamidaily editorial