有咗孩子亦要經營愛情 3招令夫妻重返熱戀期

By rachel.lo on 28 Sep 2018

孩子出世後，好多夫婦終日忙於返工、湊仔、做家務⋯⋯全部精神時間都放晒喺孩子身上，就算有僅餘嘅時間，都寧願用嚟上網、玩電話或瞓覺。大家仲記得對上一次同另一半深入交談、傾心事係幾時嗎？對上一次嘅二人世界又係幾耐之前呢？或者大家會話，湊小朋友邊有呢啲時間！的確湊小朋友係好忙，但只要你願意，總能夠擠到少少時間同另一半相處，或暫時將小朋友託付畀親友照顧一陣，把握時間做以下3件事哄對方開心吖！

1.一段深入交流

溝通絕對係保持一段良好關係嘅絕佳方法！亦只有同對方深入交流，先可以了解到對方嘅感受同想法，成為爸爸媽媽後嘅巨大生活轉變，想必會令爸爸媽媽百感交雜，有好多心事一直鬱喺心裡面而無處抒發，可能係興奮、開心、不滿、抱怨、難過等等，就趁呢段時間向對方傾訴。但雙方都要記住保持理性同平和嘅態度，呢段交流係為咗互相了解對方嘅諗法，所以喺對方發言時做好一個聆聽者嘅角色，而唔係乘機嗌交。

2.來一場約會

「休息，係為咗行更遠嘅路。」有時爸爸媽媽嘅角色或者會將自己同另一半壓到透唔過氣，時時刻刻都擔心小朋友嘅學業、健康、生活習慣等，令成個人都經常處於緊張狀態。不妨偶爾將小朋友託付畀親友暫時照顧，將自己從爸爸媽媽嘅角色中抽離出嚟，專心做好另一半嘅愛侶角色，拖住另一半嘅手去行街、睇戲、食飯、郊遊，好好享受一下二人世界！