【滴滴皆辛苦 絕不後悔嘅母乳之路】

初初懷孕既時候，我已經決定自己坐月，我知道自己坐月唔可以好好咁休息，不過...時刻陪住小雨...可以早少少摸索小雨脾性，日後自己一手一腳湊就方便好多。

捱眼瞓咁陪住小雨係好攰架...不過...我就可以見証住小雨每一個時刻...假手於人就唔會有咁難忘既經驗...自己坐月自然會明白當中樂趣...隨住小雨一日一日咁大...開始做出一個又一個既表情...感覺真係好奇妙...從前...因為要工作...我唔可以自己湊大小姐...多得舅母幫我手...湊到大小姐幼稚園完結...

當時...一星期見兩日...撞岩番通頂放假番早就只會一星期見一日...老實說...唔可以見証每一個第一次既時刻...真係會後悔唔係自己湊...小雨...我唔想俾自己再有遺憾...我要自己湊大...

好多人話小雨好似老公...記得生完住院個兩日...只得我同小雨兩個人...望住小雨就好似望住迷你版老公咁...小雨係一個男仔樣...唔似我...由開始決定自己湊...我就打算餵母乳...

四月二十五日...小雨出世啦...

小雨係重磅BB...一出世就要觀察血糖...食完奶四個小時要篤腳板...小雨第一餐...醫院冇同我講就已經餵左奶粉...一餵就餵30ML...到交俾我自己湊番...我先可以埋身餵...

埋身餵完四個鐘...姑娘來篤血糖...結果係血糖低...姑娘同我講小雨要補奶粉...唔餵奶粉血糖會唔達標...我有問過姑娘...餵奶粉...小雨會唔會唔食母乳...姑娘話無辦法...叫我埋身餵完再補奶粉...一樣係要補30ML奶粉...

波子咁大既胃...不停飲奶...大胃就係咁練成...到左第二日...血糖穩定...唔需要再補奶粉...我就開始餐餐埋身餵...一喊我就餵...一喊我就餵...剛剛生完兩日...未上到奶...點可能餵飽已經練成大胃既小雨呢...

基本上...小雨唔肯落床...一落床就喊...只有抱下埋身啜下安撫小雨...讓小雨可以瞓下...小雨瞓下醒下...一醒就喊...根本未有好好瞓過...

直至四月二十六日半夜...抱住依然喊過不停...我投降了...決定補奶粉...

小雨一啜就啜左40ML...然後就安靜下來瞓覺...唔係我抱到攰頂唔住...又唔係啜到我痛頂唔順...係我根本唔忍心由得小雨捱肚餓...住院期間...姑娘會不時問下同埋觀察下埋身餵情況...

基於我個乳頭短...加上小雨個咀太細...埋身情況唔係咁理想...姑娘建議我手楂奶出來俾小雨食...等小雨大少少再埋身餵...

第一次手楂奶...楂一個鐘先得10ML...真係滴滴皆辛苦..原本淡淡定諗住埋身餵...奶樽和蒸氣煲全部未開封...唔可以埋身唯有出院前叫老公開封消毒...準備出院後用...

自己未上奶...又唔可以要小雨捱餓...出院前買埋奶粉...準備食完人奶唔夠補奶粉...

四月二十七日晚出院開始... 日對夜對小雨...一喊我就埋身餵...可惜依然唔成功...小雨好努力不停啜但係我好肯定係食唔到奶奶...因為...我開始谷到硬...谷到痛...我嘗試過泵...不過...當時...可能塞左...泵唔出...係一滴都泵唔出...其後泵到乳頭痛...我放棄唔再泵...

可能剛剛生完...情緒唔係咁穩定...因為自己埋身唔成功...我試過喊...不斷循環咁諗點解人地餵到...自己就餵唔到...好彩老公安慰我...同我講...餵唔到唔一定係我既問題...真係唔得就餵奶粉...唔好勉強自己...個陣餵奶粉...個女咪一樣咁大大件...

我開始放鬆心情...唔再強求逼自己埋身...手楂出來餵小雨...未有技巧可言...當然失敗啦...小雨得幾日大...我真係有點手忙腳亂...多左一個人仔要照顧...時間唔夠用...

未有安排定時定候楂一楂...一日唔好講八次...六次一樣未必有...最終谷到石頭咁硬...硬到痛...痛到瞓唔到...夜晚要食止痛藥止痛...

谷住左泵唔出楂唔出...小雨食左幾日全奶粉...話就話唔強求餵母乳...我依然請教餵母乳既好姊妹...

開始學下按摩...手楂奶奶...用奶樽餵...由初初十毫升到二十毫...真係每一滴有汗有淚...楂三十至四十分鐘...真係楂到手軟架...忍住痛咁楂左三四日...乳房終於鬆番...

小雨未有埋身...上奶比較困難...楂咁多日...我係未有所謂奶柱射出黎...飲上奶湯谷奶...一樣未見成效...一路只係一滴滴累積下來...餵左小雨飲滴滴母乳再補奶粉...

可惜...出現第二個問題...其中一邊乳頭開始脹痛...楂好耐先有一滴滴出黎...我又上網解究...可能我手楂得唔太好...好似係奶既脂肪塞住...所以...手楂前...我就先先淋個熱水浴...跟住邊楂邊熱敷...

我買左手泵幫幫手...

情況慢慢改善...開始滴得密左...密下密下就出現左第一條虛線咁既奶柱...奶柱出現...奶量去到一安兩安...可以餵一半人奶...再補一半奶粉...

見到密密楂既成功...心中暗自歡喜...可惜...奶量未足夠已經要食三四安既小雨...依然餐餐要補奶粉...

到十二朝...我開始加黑豆煲炒米茶飲...日日飲魚湯...日日食一個大木瓜...嘗試用電泵泵奶...一日泵七次...每次泵二十至三十分鐘...

泵奶時間: 08:00, 11:00, 14:00, 18:00, 21:00, 打後兩次就唔定...

奶量漸有起色...偶然會有三四安出現...勉強夠一餐...補奶粉餐數就減少了一餐或者兩餐...我同老公商量過...自己湊就唔做雪奶冰奶...即泵即食...泵唔切就餵奶粉...

為免半夜食左一半人奶就嘈...半夜一餐就餵奶粉...小雨由初初出世開始食八餐奶到五月中食六餐奶...

一日五餐人奶半夜一餐奶粉...二十日左右...奶量己經可以做到每餐三或者四安...

不過...小雨偶然要食五安奶了...一樣要偶然補少少奶粉...不定時六餐奶到定時定候食六餐奶...我可以早少少泵定...小雨滿月...我將半夜一餐轉埋做人奶...

我終於做到一日六餐人奶...可惜...奶量依然唔穩定...有時三安...有時四安...有時五安...未做到供過於求...有時爭半安...有時爭一安...偶然好彩就做到岩岩好...

唔好睇少半安至一安...小雨真係會喊到你開奶粉為止...唔食唔會放過你...

補奶粉大約補一至兩餐...日子維持大約一個月...直至...

五月三十一日...一個值得紀錄既日子...

小雨全日食人奶...唔需要補奶粉...唔係好多奶...只係剛剛好餵飽小雨...勉勉強強追到啦...

當全人奶左好幾日...我開始大想頭...想試番埋身餵...我預先泵一邊乳房待小雨食一邊乳房再餵...誰不知...

小雨唔肯埋身食...不停喊...未餓既時候試過...餓既時候又試過...

最終係我投降...要即時用奶樽餵...一邊乳房奶量唔夠飽...又要即刻食...唯有補番奶粉...

經過幾日泵一邊唔泵一邊...出現左塞奶...不單單奶量下降...谷到硬...硬到痛...痛到想喊...

補奶粉多左...埋身嘗試要暫停...我要追番奶...用左幾日時間...成功通番...唔再硬唔再痛...

奶量去到一次五六安...足夠一餐...

奶量尚算穩定下來...小雨又可以飲全人奶...

偶然有一餐半餐...喊到攪唔掂要逼住開奶粉...

隨住摸熟小雨脾性...慢慢調節小雨既生活習慣...

由六月十一日開始...小雨已經係飲全人奶啦...

泵奶時間: 04:15, 08:30, 12:00, 15:00, 18:30, 21:00, 23:00

一日泵七次...餵六餐...

飲奶時間: 05:00, 10:00, 13:00, 16:00, 19:00, 22:00...大約三小時一餐...

泵多過餵...泵下泵下自然會多奶...

初初我以為泵會兩邊份量相約...原來唔會...

一邊多一邊少...我兩邊相差有兩三安咁多...

健康院姑娘教...如果要增加奶量...泵清後隔十分鐘再泵十分鐘...有機會造多少少奶...

我試過係得既...我就泵多一安出黎...

七月八日...小雨唔多願食...食飽就瞓...頭四餐食奶時間就順延一小時...

自動SKIP左19:00一餐...個晚21:30左右就喊啦...

個日飲奶時間由三小時一餐變左大約四小時一餐...

七月九日...我就嘗試稍微調一調時間...睇下小雨係唔係要轉時間時餵奶...

我唔敢一下遲一個鐘泵奶...怕小雨喊到要開奶粉...

只係延遲二十分鐘...又得喎...小雨當日飲奶時間大約相隔三小時四十五分鐘左右...

我既泵奶時間要變動了...05:00, 10:00, 14:00,18:30, 21:30, 23:30

一日泵六次...餵五餐...

飲奶時間: 06:00, 11:00, 15:00, 19:00, 22:30...大約四小時一餐...

小雨奶量已經去到四至五安...偶然會飲六安...

一日六泵...奶量可以去到七至八安...

朝早05:00會去到爆樽...

我見餵奶時間穩定...又想埋番身...

七月十一日開始爬文...入埋WS追奶群組...希望睇下有冇妙計埋身...

好多媽媽話要狠...唔好理BB喊...塞到BB食為止...

七月十二日...我嘗試左三次...

每一次小雨一樣係喊到癲左...不停向後拗腰...不停伸直雙腳...

務求要同我乳房保持一定距離...

老實說...見到小雨咁抗拒真係有少少傷心...

我冇堅持到小雨喊到食...見到佢喊到咁...根本做唔到狠...

餵小雨飲奶途中...我試過拎走奶樽...放入咀咀...

小雨未有上當...即時爆喊...

我唯有放番奶樽入咀等小雨繼續安靜飲奶...

望住小雨飲完奶既滿足樣...我開始回想自己究竟係想點...

我原意係想小雨飲到母乳...泵出來一樣係母乳...點解要去強求埋身餵...

自知小雨飲奶嗰陣個下唇唔係反出黎...根本做唔到張開大大個咀咁啜...

繼續逼小雨...我真係做唔到...

雖然...埋唔到身餵唔可以同小雨有再親蜜時刻...

不過...泵得出有得飲好過冇得飲啦...

我唔知道我既人奶路可以行到幾遠...

只有...盡量食多D...飲多D...堅持得一日得一日...盡力而為啦...

七月十四日...我食左蒜頭豆豉蒸倉魚...好味過頭...撈左飯食...

點知...中伏了...接着既一星期就經歷心驚膽跳既退奶日子...

當晚已經即時冇左谷奶感覺...奶陣會出現既麻刺感一樣唔見左...

乳房軟淋淋...未有脹...未有谷...

四個鐘五個鐘一樣唔脹唔谷唔漏奶...

朝早06:00泵未夠二十分鐘會爆樽支奶...變左泵三十分鐘只有七安...奶量急跌左三分一...

跟住下一餐奶...奶量再跌...泵左四十分鐘先勉強夠五安半...僅僅足夠小雨一餐...

一向即泵即食...未有任何冰奶做儲備...心情真係跌落谷底...

剛剛先至調整好心情...好好做一個泵媽...轉頭就來一個大考驗...

第一日飲番魚湯...食番木瓜...奶量未有一下子增加...

只有逼自己至少泵足五安半先收手...希望做到唔補奶粉...

試左兩日...奶量未有增加...

一餐奶至少泵四十分鐘...勉強維持到五安...我開始擔心會唔會逐少咁收奶...

第三日...朋友仔教我泵番密少少追番奶...

一日六泵變番一日七泵...不過咁做...食奶個餐就分薄左...

只有逼自己泵耐少少...一定要泵夠五安俾小雨食...

唔夠食...下一餐食奶時間會稍稍提早...我唯有早少少泵...

奶量依然未有太大起色...不過...泵三十五分鐘就泵到五安奶...

第五日...我尋求母乳指導...睇下有冇捷徑增奶...

姑娘教左兩步...第一步唔係加泵...

姑娘教我第一步其實係要刺激噴奶反射...

泵奶前盡量同小雨做番多少少親蜜接觸...第二步先係加泵...

泵奶泵到咁上下就停一兩分鐘...去抱下望下摸下小雨再去泵...

奶就會多番少少...不過...只可以一次...

姑娘教我泵左一邊奶陣就轉到另一邊...不停交換泵...

泵到一滴滴就要收手...唔好死泵...

唔好諗住空泵可以增奶...泵唔好超過三十分鐘...

嘩...我死磨咁泵四十分鐘先有五安喎...

原來我用錯方法...做唔到增奶...

我試過刺激噴奶反射唔得先考慮做第二步...

跟住既一餐奶我就嘗試姑娘教既方法...

第一轉泵得四安...第二轉有兩安...六安夠小雨食啦...

隨後一兩日...奶量慢慢咁增加...去番八安...

久遺了既麻刺感同谷奶感有番少少...

朝早06:00一轉泵二十分鐘有十安...心終於可以定下來...

一波停定...一波又起...

七月二十二日晚餐奶...小雨竟然只飲了一安半...

不單止唔飲奶...扭計喊左足足一個鐘...

抱又喊唔抱又喊...最後要拍左一下肥肥既脾脾先收聲...瞓覺了...

不過...七月二十三日晚餐奶一樣唔多願飲奶...只係飲左兩安左右...

慶幸...未有再扭一個鐘...抱住氹左一陣就瞓覺了...

健康院姑娘話小雨應該唔會點加奶...事實就係小雨飲六安既次數明顯多了...

唔知係因為飲大左個量時間可以維持得耐少少還是出現所謂既厭奶期...

小雨晚餐奶真係鍾意飲就飲...唔飲就扭...

晚餐奶唔飲唔緊要...待小雨想起身...自己就早少少泵奶啦...

計番每日飲奶量最少二十三安...最多三十安...

我諗唔係厭奶期啦...只係偶然一兩餐飲唔落...

其實我係有少少擔心厭奶期...小雨飲奶係要等泵奶...

一泵就等至少二十分鐘...唔係隨時話飲就飲...

真係出現即時要飲既情況...泵唔切只有開奶粉...

奶粉已經買左準備隨時候命...

無驚無險咁過左八月...小雨一日依然五餐奶...飲奶時間一樣...

唔經唔覺...小雨已經四個月了...

期待快點到第一個CHECK POINT...六個月...

母乳路唔容易走...衷心咁讚頌親餵母乳既媽媽...

不過...我想同未能親餵母乳既媽媽講小小說話...

每個小朋友既個性不同...唔可以一個小朋友係咁就套入第二個小朋友身上...

餵人奶唔係話自己得其他媽媽就一定得...餵唔到一樣係可以有原因...

初初未有奶...我真係做唔到唔補奶粉...任由小雨餓住肚...

大食妹冇得食喊得好可憐...冇得食好陰公豬囉...

唔好講到餵奶粉既媽媽唔愛錫小朋友...有時身不由己係你唔知囉...

旁人唔知頭唔知路真係唔該出少叫聲當幫忙...多少少關懷下個大人啦...

我係要補奶粉既過來人...曾經為着埋身餵母乳鑽過牛角尖...

心入面真係好好好難受...情緒真係一發不可收拾...

我埋唔到身唔代表我餵唔到人奶...係就係麻煩少少...我接受到就得啦...

我想講我好想埋身餵...但事實係真係唔得囉...

唔好太過勉強自己一定要餵人奶...放鬆一下自己...

唔好覺得餵奶粉唔見得人...飲奶粉一樣可以飲得大既...

只要諗下BB食飽飽個滿足樣就已經足夠...無需要懼怕閒言閒語...

我唔敢講自己係一個成功餵哺母乳既媽媽...

只可以話係一個仍然學習中既全泵奶媽...

唔可以同人分享埋身餵既上奶經歷...只能夠分享我全泵上奶既小小經歷...

願其他餵人奶遇上問題既媽媽可以創出自己既餵奶路...

共勉之...

小雨由六月十一日開始飲泵奶直到...日誌於九月五日分享...依然努力泵...\

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：MR. MOON & RAIN 甜心小屋

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！