盡力學習照顧新生命 5句說話好打擊新手父母

每個人都需要時間去學習全新嘅事物，例如初生BB初來乍到，要依靠父母去學習適應呢個世界；而新手父母亦係第一次面對咁細嘅人類，喺照顧上或許會顯得有啲笨拙、緊張同不知所措⋯⋯但當新手父母全心全意、傾盡心力想將BB照顧好時，聽到呢啲說話都難免會感到氣餒。

1.你個B喊呀！你唔知佢想點㗎咩？

BB喊可以有好多原因，新手父母未必咁快清楚BB唔同嘅喊聲係代表住啲咩，但呢句說話會令新手父母覺得自己唔理解BB而感到氣餒。

2.B唔係咁湊㗎！應該⋯⋯

唔同人都有唔同嘅湊B方式，新手父母都會喺唔同渠道吸收大量育兒資訊，請畀機會佢地嘗試同實踐，而唔好強行將自己果套塞畀新手父母。

3.你連沖奶都唔識！？

第一次沖配方奶嘅父母會以為係好似平時啲沖劑咁先落粉後落水，但原來係要先落水後落粉，雖然係一個簡單嘅動作，但都會令新手父母質疑自己嘅能力。

4.BB唔鍾意你抱呀！

唔係所有人天生就識抱BB，就算姿勢正確，都可能因為爸爸媽媽冇咩肉而令BB瞓得唔舒服而喊，當4大長老聽到BB喊聲嗰陣，就乘機講呢句對白黎搶走你手上嘅BB，一句BB唔鍾意你，就好似係一個好充分唔畀你抱BB嘅理由，但同時亦會令爸媽感到好傷心。

5.唉！新手父母！

呢句說話通常出自於自以為好有經驗嘅婆婆／奶奶口中，當新手父母第一次帶初生BB返健康院做檢查時，會遇到好多同樣帶孫做檢查嘅婆婆／奶奶，當新手父母聽到BB喊又唔知BB想要咩而手忙腳亂時，一堆婆婆／奶奶就會好熱心過兩招畀新手父母，最後贈多一句「唉！新手父母！」而離開。其實第一次做父母，湊B經驗當然比唔上連湊兩代嘅長輩咁有經驗，不妨畀多啲鼓勵佢哋吖！

初為人父母，好多第一次都有機會做錯，但只要慢慢累積經驗，自然會成為熟手爸媽！

Text: Mami Editorial