媽媽最常聽到嘅5句說話 身邊嘅人因關心而意見太多 令媽媽煩惱矛盾更多

周圍嘅人實在太熱心，同小朋友出街好多時都會聽到好多唔同嘅意見，有時係隔離鄰舍，有時係日日見嘅保安叔叔姨姨，有時甚至係唔識嘅路人。當中有實用嘅提點，亦有啲會令媽媽感覺煩悶，原因係好多時，每件事都可以有唔同意見，同埋唔同做法。最後，點做都好，都會聽到另一啲意見。下面嘅情況，媽媽們有無遇過呀？

1.「凍呀，小朋友會唔會唔夠暖？」

另外仲有一個版本係，「焗呀，唔洗著咁多啦」。兩種情況都會發生。有時真係會有一種多又嫌多，少又嫌少嘅感覺。多謝完對方嘅善意之後，其實可以再諗下實際情況先再決定，因為始終最清楚小朋友身體嘅都係媽媽自己。

2.「小朋友咁細，書包咁重，點解唔幫佢拎？」

但另一日，又可能有另一位阿姨同你講，「小朋友要學吓獨立，唔好咩都幫佢做晒」。

3.「仲未戒片呀？」

其實戒片唔應該以年齡去做界線，要視乎小朋友嘅心理同生理發展。其他人又點會比爸爸媽媽，或者照顧者，更了解小朋友嘅發展同能力呢。

4.「小朋友咁瘦嘅？」

其實太肥先係唔健康，但好多長輩都仲係覺得肥肥白白先好。除非真係過輕，其實最緊要係營養均衡。

5.「佢好怕醜喎」

面對唔熟悉嘅人感到無安全感，同埋識得分邊個係陌生人，作為爸爸媽媽，其實覺得係件好事。教小朋友有禮貌咁打招呼係好重要，但都要比啲時間小朋友慢慢學習。各位媽媽，千祈唔好在意其他人嘅諗法呀，慢慢鼓勵小朋友，如果佢地真係未準備好開聲打招呼，可以先試下比佢地揀同對方笑一笑定揮揮手。

Text: Mami Editorial