容易實行又增進到感情！5個同小朋友一齊做嘅小任務

每個小朋友都鍾意可以同爸爸媽咪一齊，尤其是年紀越小嘅小朋友，可以比玩具、零食、甚至電視或電子產品仲吸引！同佢地一齊做嘅小任務可以好簡單，當中增進到感情之餘，仲可以順便訓練佢地添！

1. 一齊刷牙 

一家人一齊刷牙，雖然刷緊牙，講唔到野，但就係有一種講唔到嘅快樂！

.

2. 一齊晾衫

節省完成家務嘅時間之餘，仲可以訓練小朋友嘅小手肌。過程中，其實仲可以教導小朋友分辨大小、顏色，同埋學習分擔家務的責任感。一齊完成家務係一件好開心嘅事，不妨一試。

.

3. 一齊打掃

雖然打掃之後，效果可能未如理想，但如果放手比小朋友去試，佢地一定做得到。大家分工合作，做晒之後，可以用水果或者甜品作為鼓勵，令小朋友覺得努力打掃係一件開心嘅事，一個開心嘅回憶。

.

4.  一齊食飯

早餐、午餐、或者晚餐，係咪每一餐都一齊唔重要，最緊要爸爸媽媽記住收起電話同平板電腦，大家開開心心邊食飯邊傾計。

.

5.  一齊聽音樂同睇書

瞓覺之前，同爸爸媽媽一齊聽音樂同睇書，呢種簡單既快樂，一定能夠滿足每一個小朋友。

其實，唔需要特別的活動，只要一齊去做，差唔多每件事都可以變成親子活動。日常大部分嘅事情，加點變化，變成有趣嘅小任務，同小朋友一齊完成啦。

Text: Mami Editorial