【做媽媽無既定嘅制度 去衡量點先岩係岩 千萬唔要誤聽指控而抹殺自己能力】

說者無心，聽者有意。

相信好多人都聽過喱句說話，而且我亦相信大部份人都會經歷過同感受過喱啲言語既威力。

例如:

1)老公:你估我番工唔攰嫁？好似你日日咁閒淨住陪阿b玩就得？

老婆:大家都有付出，點解你賺錢就一定係辛苦啲？

2)老公：其實生仔生女都無所謂既，不過仔就最好喇，唔好之後再追咁辛苦丫嘛

老婆:我控制到？

3)老公:唔係你有左我都無諗住咁快結婚

老婆:其實女人聽到真係會心碎

4)老公:你咁後生，有手有腳都要坐？

老婆:我個肚唔明顯唔代表我無需要

.

其實日常中總有好多大家衝口而出唔洗負責任既說話。女人係感性既動物因為女人有與生俱來既母性，我唔係話男人無只係感受通常比女人較輕微。好多野你不經易講一句但其實女人都會不斷係腦海中回帶，由其係懷孕中媽媽更容易受到荷爾蒙同外來因素影響。

就好似我為例，我同好多大部份既人一樣，多一事不如少一事。但並唔代表我懦弱或者吞聲忍氣。

我成個孕期中，肚唔係大，可能因為bb唔吸收同埋加上自己仲後生，我直到懷孕8個月都可能只係其他媽媽3個月大既肚。所以我出街撘車基本都無人會讓座比我，而我如果無覺得攰或者唔舒服既時候我都寧願選擇企。一來我唔想受到不必要既目光，二來我亦唔想為一啲無關痛癢既人動胎氣有唔好既胎教。

.

直到我生左波波頭，我都發現，如果你撘地鐵，我抱住波波頭一樣唔會有人讓坐，撘巴士就好啲。通常都會有人邀請你坐。（可能係我個別例子，我無話一定地鐵無人讓)

^缷貨前一星期

然而，每次抱住波波頭出街，身邊都有人會好開心想同bb傾計，都有人用奇異眼光望你，或者有人更會講一啲令你莫名著火既說話。

有一次，因為波波頭爸爸要番工，所以我就自己一個帶住波波頭去超級市場買餸。 而喱次就係有個婆婆經過我身邊既時候就講左句，”哎啊，小朋友湊小朋友好慘啊。” 我相信個位婆婆既說話唔係有惡意，但係就令我個心好唔舒服聽完好唔開心。

.

可能二十幾歲係老一輩既眼中依然化小朋友，我唔介意。但點解一定要咁妄斷話我小朋友係慘？

.

就算90後媽媽係年輕，就算新手媽媽係無經驗。但我地仍然好努力學習做個好媽媽，我地一樣會想將最好比小朋友，我地一樣會捱眼訓幫小朋友換片餵奶，一樣會全心全意照顧而唔係生完就唔理。

個種感覺就好似就算你幾努力，但一旦比人標籤，一句說話已經抹殺晒你所有既辛酸。

或者我再形容得貼切啲，當你好努力，就算已經好痛，但都想bump多小小人奶出黎，那怕只係得10ml。但因為緊張，壓力，反而令你更加無人奶。甚至身邊既人同你講，算喇，米鬼bump，得個啲啲，晒時間晒精神，沖奶粉咪算。

其實所有媽媽都好需要體諒同鼓勵，那怕只係一句”你已經做得好好，辛苦晒。”

＝＝＝＝＝＝＝＝＝＝＝＝＝＝＝＝

Text & Photos : 波波頭Mami

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！