【媽媽心聲】BB展你係為咗購物定享受難得嘅購物時刻？

每年一到BB展就係家長們出動嘅時候，無論孕媽媽、初生媽媽、加固中媽媽，定大小小嘅媽咪通通會衝去塞爆個會場。記得第一胎個陣去BB展覺得好新奇，樣樣嘢都唔識第一次見呀嘛。簡直係大開眼界。呢樣覺得要買，個樣覺得要買。加上網上大量攻略，點樣印定地址呀，邊檔嘢有咩好換呀，邊檔啲贈品又換哂呀，成件事真係好刺激。仲有啲媽咪將啲贈品上網賣番出去。

Photo from 僑蛋媽

感悟行BB展嘅樂趣

呢家到咗第二胎就清醒好多啦。懷孕中去會拎下紗巾、口水肩。但到生完後去其實好多贈品都未必啱用。「Like就有紗巾送噃！」唔使啦我屋企超多紗巾。「一張卷送口水肩！」我連拎返屋企都嫌重！「媽媽奶？」唔使啦，我連送比朋友要交收都懶。仲有一堆咩消毒用品呀，小玩具呀。問心其實我興趣不大，反而送食品呀，尿片呀濕巾我有興趣。

但行BB展我真係好開心，但既然贈品我唔係真係咁需要。到底係咩嘢驅使我行足7個鐘BB展，又搬又抬番到去依然覺得好開心呢？

然後我就明白啦…BB展行既並唔係啲嘢有幾平幾抵買，啲贈品有幾抵幾啱用。而係行緊我嘅自由…

無得shopping嘅女人係唔幸福嘅

有幾多媽咪同我一樣，BB出世之後全心全力照顧小朋友，朋友無見過，街無行過，電影無睇過？推住BB行過商場想買嘢，望望身邊嘅老公同呀B，算啦，下次有時間我自己再嚟行。但結果你從來無時間，你所有嘢慢慢都變晒做網購。

女人根本就係天生嘅購物狂，你唔比佢買嘢行街簡直係慘無人道，無得shopping嘅女人係唔幸福嘅。即使你網購幾萬樣嘢都總係差咁啲嘢。

而當你去到BB展。你可以拎著呀B嘅名義大展拳腳盡情購物，個種開心興奮真係難以言喻。我唔理幾多嘢無用，要搬幾重。我買嘅就係一個爽字。我明知我做排隊黨一個鐘嘅錢都多過我排一個鐘換得盒米粉嘅錢。但我搬到返屋企攤晒係地下影相就係爽！

Photo from MamiDaily

給老公們的忠告

各位老公S真係唔好怪啲媽咪點解咁癲走去排幾個鐘隊，唔好同佢講差個幾十蚊我比番你你落樓下買算啦！千祈唔好陪佢去到係咁催佢走得未。

你永遠唔會明白女人享受購物過程個種快樂。就好似女人永遠唔明明解你打機可以打天光一樣。

千祈唔好傻到扮貼心陪佢去排幾個鐘隊咁天真。你又排到傻，老婆見到你黑面又嬲到傻。信我……下次爸爸們試下放低張信用卡比老婆，叫佢約定啲媽咪朋友，幫佢準備好喼一個，準備好幾個鐘後再出去接返個容光煥發嚟老婆返嚟好過。

延伸閱讀：

【不良影響？】父母與子女嘴對嘴親吻很奇怪？媽媽與4歲孩子親嘴惹爭議

延伸閱讀：

【職場育兒】女兒嘴甜深得老細心，真係幫到阿媽事業！因一事獲提早升職加薪！

Text & Photos： 僑蛋媽