【小小車手齊集室內迷你車場 讓小孩從玩樂中學習獨自完成任務】

難得嶠爸放假，當然又要搵地方去玩啦！之前睇左好多介紹，知道九號水產有好野玩，所以見平日就去左玩！我地選左下午茶時段去，等小朋友訓左午覺先去！但下午茶時間就有些店舖會休息的！

我地就直接去左遊戲區！

要先去購票，$40，每個遊戲計，有3個遊戲可選，有《小小車手大任務GoGoGo》、《電動車》和《遊戲區》。最後我地選左玩《小小車手大任務GoGoGo》，因為小小車手大任務GoGoGo，係一個比小朋友挑戰自己嘅機會，靠自己去完成任務！睇下可唔可以完成任務！所以我地都想比芊嶠試下挑戰哩個大任務！

要先選一輪愛車。

小小車手大任務GoGoGo，會有唔同任務，適合唔同年紀的小朋友玩！

哥哥會問小朋友年齡，之後為佢選擇適合的任務，再好細心地同芊嶠講任務係咩，要先去買咩，再將買左嘅野拎去舖頭交低，仲有錢比芊嶠，叫芊嶠買野嘅時候用！

第一個任務係要去1號舖買雞蛋，芊嶠好好笑，都唔記得要買幾多隻雞蛋，職員向佢收錢，佢都唔記得自己有錢係身，仲要拎哂全部錢比職員！買完後，職員會幫佢係張印仔卡到蓋印，表示小朋友完成左哩個任務！

之後繼續揹返個袋，揸住架車去下一地點！

第二個任務係去到拉麵店，將第一任務買嘅其中兩隻雞蛋，交低比拉麵店職員，最好笑係明明一盒已經有兩隻雞蛋，叫佢交兩隻雞蛋，講左好耐佢都以為係交哂兩盒。完全任務後可獲得印仔一個！

第三個任務，就係交埋餘下兩隻雞蛋去雪糕店，哩個任務最易，因為手上只餘下兩隻雞蛋，交完比職員後，可獲蓋印一個！

第四個任務，係去日式餐廳，買一個便當比媽媽食！芊嶠去到話要買，但職員問向佢收錢，佢就要行返去出面嘅枱仔，將背囊放係枱到搵錢！不過佢都算醒目嘅，順便拎埋印仔卡比職員蓋印。之後又行返埋枱將便當收入背囊。

最後，回到起點，將便當和各樣物品交比哥哥，就可以獲得一份小禮物！成個做任務過程中，我好多次都想幫芊嶠，但開始時哥哥講左一句，我同佢講就ok！小車手大任務GoGoGo其實係想家長放手，比自己小朋友去試，睇下佢地明幾多，做到幾多，真係一言驚醒，點醒左媽媽我要放手！所以成個活動我都比芊嶠自己試，真係佢求救，我先出手！

《電動車》$40 / 10分鐘，高度 80cm-140cm 的小朋友。

《遊戲區》有充氣彈床 和 小型遊樂設施，$40 / 10分鐘，高度 80cm-140cm 的小朋友，少於80cm 需由家長陪同呀。

另外，星期六、日或公眾假期，九號水產仲會舉辦親子烹任班，想知有咩活動，要 follow《九號水產 Nine Seafood Place》Facebook 專頁啦！

===================
九號水產

地址：紅磡德豐街8號黃埔新天地第九期地下
電話：2121 0606
營業時間：10am – 10pm

Facebook：https://www.facebook.com/nineseafoodplace/

遊戲區開放時間：
星期一至星期五：2pm – 9pm
星期六、日及公眾假期：11am – 9pm

**小小車手大任務GoGoGo (每日 2pm – 6pm)

＝＝＝＝＝＝＝＝＝＝＝＝＝＝＝＝＝＝＝＝＝

Text & Photos : 嶠媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！