【媽媽心聲】帶住小朋友嘅媽媽比較好恰嗎? 媽媽們要團結起來，在外要互相幫助!

最近遇上兩件事令我覺得有點唔開心和嬲。有部份人總愛難為「媽媽」，也許帶着孩子的母親看來好似比較「好恰」。剛剛星期六，出完街，帶住小朋友搭shuttle bus 返屋企。咁啱我哋最後四個可以上到shuttle bus ，但因為最後上車，所以我同囡囡要分開坐。得返前座後座，於是我叫囡囡坐後面，提她快快自己扣好安全帶。(她坐後座係因為佢先上車，走廊好窄。好難再調位。而且唔快快坐好，車就開唔到，有可能會有人罵。)

被乘客指責不幫女兒扣安全帶

當時因為我唔可以坐喺佢隔離，所以我唯一可以做嘅就係叫佢自己快快扣好安全帶以確保佢嘅安全。當然我叫佢扣之餘，都會留意返佢自己扣唔扣到~

依家shuttle bus，我哋已經搭咗一個月。每一次佢都係自己扣好安全帶!當然如果我想幫佢扣，佢都唔俾，其實小朋友有d嘢自己做到，佢會想自己做!

此刻，坐前座嘅良善大叔見到原來我同囡囡分開咗，主動提出交換座位令我同囡囡可以一齊坐。世上總有不計較樂於助人的人 ~

當我同囡囡坐好後，本來坐囡囡隔離嘅後座大嬸說:「搞錯呀~要個細路自己扣安全帶!」(好唔禮貌嘅語氣)

我雖然心裡好嬲，無端被罵，但我仍溫柔地說: 「佢自己識得扣。」(面掛笑容，雖然戴住口罩睇唔到，但語調溫柔，雖然心裡……)

嬸嬸細細聲唔知講乜以示不滿。

我今次有少少惡: 「你講乜嘢呀?」

嬸嬸說:「冇嘢喇..」(今次唔敢再惡，可能知道我唔係咁好蝦)

之後我叫阿囡扣好安全帶，讚囡囡叻叻，一向都係自己會扣好。

其實搭校車都係自己扣，都快5歲了~你話我叫個一兩歲嘅自己扣就話有問題...

有時囡囡扭眼瞓時，會做D奇怪嘢，試過幫個書包同麵包扣安全帶。(當然當時架車有好多空位)

女人何苦為難女人

如果幫佢扣，可能又會被人話，咁大個都要阿媽幫手扣。

做人阿媽好似做乜都係錯>.<

問題重點唔係阿囡自己識唔識扣安全帶，係路人第一句就批鬥娘親。

如果路人係出於關心小朋友嘅安全，怕佢自己唔識扣，係咪可以問小朋友自己扣唔扣到，使唔使幫手呀？又或者提出調位幫一幫我哋。

絶對唔係話佢唔調位唔啱，問題在於佢嘅態度！

路人請自重 ，關心和挑剔只是一線之差。

有時出街，天氣涼咗，路人都會善意提點要幫小朋友著多件衫。

其實善意嘅提點，當媽嘅都會接受。

相信當媽的喺沒有做過傷害或影響他人嘅事情下，被路人責怪，當然氣上心頭。

總是不明白當女人的為何要為難女人？

被路人嫌棄阻路

之前喺重陽節假期，我哋去咗黃金海岸玩，又遇到另一單女人為難女人嘅事。

我帶咗孖寶去廁所，隊友叫我哋去完去7-11搵佢。

於是我哋去完就入去搵隊友，一個拖住兩個入去望咗兩眼。

唔見隊友諗住走，發現有一家四口想過條路，我即刻拉埋兩個小朋友去一邊，讓條路出嚟，我同時亦say sorry。

個女人同佢老公每一拖住一個比孖寶年長嘅小朋友行過，附送一聲 :「喳」(以示不滿) 以代替「唔該哂」。

其實我最多阻佢2秒，我見到已即時讓路，仲道埋歉。

有些人總覺得全世界圍著他轉~

佢阻人就得，人阻佢就唔得~

我唔信佢成世人每分每秒都未試過阻到人~

人總要經歷生老病死，總會遇到脆弱嘅一刻。

身體健全唔係必要，好彩嘅我哋有健全嘅四肢。

每個人都會老，難道嫌人阻住你嘅人唔會變老嗎？

(請別人) 將心比己

(請自己) 別太難過

沒法管好別人的嘴巴

只好管好自己的內心

當媽的，希望我哋假若有緣喺街碰上，大家都能互相幫助，團結起來!!

有時我會諗，以上情況，如果換成「大隻佬」，那些女人係咪唔敢出聲？

睇嚟我要操大隻D？？？

不過其實我好惡架，唔好得罪我…哈哈~

延伸閱讀：
【親子好去處】包羅萬有手作市集~細菌小子飛船電動車+駐站魔術師

延伸閱讀：
【親子好去處】大叔的愛取景地+壁畫村+跳蚤市場　錦田1日遊必影張家朗壁畫！

Text & Photo : 龍鳯孖媽