【親子好去處】大叔的愛取景地+壁畫村+跳蚤市場 錦田1日遊必影張家朗壁畫！
雖然東京的體育盛事已經閉幕，但我哋仲可以延續運動熱潮，沾沾金牌得主的光，原來男子花劍個人賽金牌得主張家朗已悄悄出現喺壁畫村。預先搜集咗資料 「如何前往壁畫村」，有些人教話步行前往，但冇講明行幾耐，睇 Google Map 望落又好似好遠（其實我係一個 Google Map 白痴）。有些人話可以搭車，搭巴士 64K 由元朗站或錦上路站上車都得（但上車點不同，巴士方向也不同，因為壁畫村位於元朗站和錦上路站之間）。
我哋喺錦上路站B出口出，本來想步行，但豬隊友話「乜有車都唔搭啊！」好啦！咁我哋行返去C出口搭巴士64K（錦上路站上，所以往元朗方向）。搭咗2個站喺祠堂村站落，一落車就見到！
紅磚屋
一個外牆由紅磚堆砌而成嘅室內市集，充滿異國風情，售賣唔同手作和工藝品。另外仲有食肆，行吓食吓嘢都幾好。紅磚屋內外影相都充滿藝術感， 打卡一流 ！同時，呢到亦係「 大叔的愛 」取景地之一。「 Where is 田田？」突然有位大叔喺我隔離戚眉，然後問我：「我似唔似田田？」曾經有個靚女（這位大叔嘅表妹）send 咗田田張相畀大叔，話覺得家中大叔有D似田，自此這位大叔沾沾自喜。不過大家當笑話一則好了，畀佢自己開心一吓，唔好咁認真！雖然喺室內，但裏面無冷氣，而且地方唔算大，所以我哋行咗一個圈就走人。
錦田壁畫村
原來沿住紅磚屋前面嘅行人路行2分鐘左右就會到壁畫村，唔同嘅壁畫為村落增添色彩，而張家朗嘅壁畫更係突顯香港特色！戶外地方始終較曬，而且當日天氣炎熱，行咗陣已變「水人」，所以冇影哂就走。另外，村落仲有人住緊，所以大家緊記參觀時要保持安靜，同埋自己垃圾自己帶走，唔好影響人啊！
錦田街市遊樂場
沒有特別嘅遊樂場，只喺剛巧經過，小朋友話見到好想玩。所以我哋入咗去玩咗陣，始終小朋友都係鍾意玩多過打卡。回頭路行番紅磚屋，本想搭車返錦上路站，但豬隊友話見到有個港鐵站指示牌，提議話行返去。結果，原來紅磚屋對面馬路有條路直行就可以返錦上路站，大約步行5-7分鐘左右。原來呢個方法近好多，由B出口行去C出口嘅路程可能只係由B出口行去紅磚屋距離嘅一半。
盈匯坊
Well...真係好靚！由巨型貨櫃箱組成嘅商業街，當中有咖啡屋、零食店等，估唔到貨櫃都可以滲出歐陸感，形成一個慢活小鎮。我哋喺 Cafe 食午飯，食物價錢相宜，50幾蚊一個飯包飲品，仲有台式飲品或咖啡和蛋糕供選擇。但自疫情後，就少咗商店開門。
跳蚤市場
台灣味濃，好似去咗台灣夜市咁。除了售賣各式懷舊玩具，仲發現有部 「古董」Yes卡機。最特別係有間「兒童機舖」，小朋友可以玩嘅攤位遊戲同電動車。每項收費不同，由5元至20元不等，有些有禮物，有些冇禮物。這裏就連冰糖葫蘆和糖蔥餅等懷舊小食都有得賣，好似去咗一個「回到過去」嘅市集。
*注意跳蚤市場開放時間：周六、日及公眾假期 10a.m.-8p.m.
（但我哋10點幾經過時好多都未開，到12點幾行過就開咗一半有多）
後記：
1/ 每個景點可逗留嘅時間都唔耐，建議可以一次過去晒咁多個。
2/ 跳蚤市場嘅玩具店同「兒童機舖」可能係一個「伏」。小朋友會唔會一定要玩咗買咗先肯走呢？慶幸龍鳳寶寶自小訓練有素，細細個入玩具店前已講明我哋入去係睇玩具，而唔係買玩具。每次都要預告定，而且次次話想要想買時，我都要佢哋諗吓屋企有冇位先。
【隨時隨地接收更多育兒教育資訊】
📱 立即下載 MamiDaily 親子日常APP
🤱🏻 追蹤我們的 Instagram: mamidaily.hk
🔔 訂閱 MamiDaily 親子日常 Youtube頻道
