【暑假玩樂好去處】露台按摩池變小朋友專屬私家泳池 唔使同人迫早晚望維港游水

話說呢間酒店房上年同爸爸的結婚周年就想book。但係我哋早半個月打電話問已經full左了！所以一直想搵機會來住下，因為房入邊露台有按摩池，大人水深到腰，小朋友可以當泳池咁游水。疫情關係真係好耐冇帶菠蘿包游水！就好想搵個冇其他游泳客的地方游水。就係我生日爸爸就送了這個驚喜。（註：水泡裝飾玩具全部自備，酒店不會提供！）

有迎賓生果。

房望到嘅海景!

放緊水的時候，菠蘿包急不及待想落水玩。
突然間有room service，
原來係爸爸訂左蛋糕呀！
生日入住送一枝紅酒。

食完蛋糕水都未裝滿就落水啦！

玩到咁上下就去食免費下午茶，
雖然係免費但係都幾高質，
有炸餃子，芝士條，燒賣，蛋糕等等

基本上就全日喺房度玩水。
除咗食嘢之外就冇出過房啦！
簡直係玩到夠皮！
入住酒店送300蚊餐飲券，
爸爸用300蚊餐飲券訂了食自助餐，
未減價錢$628位再加一，三歲以下免費。

食完飯又返去玩水，
隔離左右都瞓晒覺我哋都繼續玩，
菠蘿包好嘈真係有啲唔好意思！
夜晚個景都唔錯係完全唔捨得瞓覺！

點解無房入邊嘅相呢？
因為我哋一嚟到就好心急玩水啦！
完全忘記咗整齊乾淨嗰陣影相！
我哋要了一張大床，
兩大一細瞓都仲有好多空間。

朝早自助餐都幾豐富，
有中式西式。

諗住可以慢慢食早餐，菠蘿包哥係咁吹我哋要快啲返房玩水。

順帶一提露台上邊係有帳篷，
如果落毛毛雨嘅話都可以繼續玩，
但落大雨就唔得啦因為無遮晒成個位！

其實而家呀媽仲喺酒店坐咗喺按摩池到出文，
我同爸爸講如果每次出文都有得咁享受就好啦！

酒店資料-
港島海逸君綽酒店
房型-
尊貴露台海景客房（呢個房比較特別要打電話/email訂房！）
可以要求酒店職員入住請開水先！來到就可以即刻玩啦！如果鍾意自己放水就來到開水兩個鐘先會滿水！其實爸爸係叫咗佢哋開水先架，不過可能佢哋太忙啦，我哋到都未滿水！
（成間酒店得七間這種房，聽職員講因為疫情嘅關係只開咗五房，所以成日都好full，爸爸建議一、二個月前訂房啦！）

價錢-
$2210一晚，星期日入住星期一退房（包左10%稅）
包早餐、下午茶、餐前小食及送$300餐飲券<～訂位嗰陣時記得問下仲有無！
不過爸爸問咗好幾個星期日入住個價錢都可以唔同，有次誇張到係$2800一晚，價錢起跳都好大！
總括來講都唔錯既，菠蘿包玩得好開心！酒店本身有免費延遲退房至三點，太多人入住啦，無得免費延遲！所以我哋多數結婚周年都會再嚟住一晚！

延伸閱讀：
【暑假玩樂好去處】鬧市中五星級酒店 Staycation 人均$237性價比高

延伸閱讀：

【暑假玩樂好去處】火山攀爬設施+賽車競投場+Melody打卡位　期間限定野餐主題室內遊樂場

Text & Photos：菠蘿包媽