【戶外放電】卑路乍灣海濱長廊公園免費放電空間 玩卡板＋砌迷宮＋滑板車＋維港靚景

最近去開香港區，就帶了和牛B同妹妹去香港西區戶外地方放電~
這裏有成5,900平方米，仲有維港海景睇~

如果好天氣的話，睇日落係一流呀!!
可惜我們當日天陰，多雲仲有霧，所以冇日落睇...

不過都唔緊要啦，因為和牛B一樣玩得好開心!!

今次去的是位於西環卑路乍灣海濱長廊，全日24小時免費開放!

而且交通都方便，可以在港鐵堅尼地城港鐵站 A出口，沿土美菲路向海邊步行，大概5分鐘路程，轉入城西道，卑路乍灣海濱長廊就在堅尼地城巴士總站隔離。除了港鐵之外，亦可以乘搭巴士 18P, 18X, 113, 904等，於堅尼地城巴士總站落車。

這裏空間大，最特別就係有好多藍色卡板俾大人、小朋友搬來搬去玩~~

仲可以利用卡板砌出迷宮、起返個小花園、小隧道亦都得!!

^ 卡板小隧道

^ 卡板迷宮
公園入面仲有之前聖誕元素(雪車)、新年的賀年全盒裝置。

^ 賀年全盒裝置一次可以容納好多小朋友，辛苦大人合力推動全盒~可以旋轉360

^ 仲有特式的移動心心椅~

^ 雪車款的車仔~打卡、一家大細坐在上面都唔錯~
海濱長廊公園沿海路段不算長，但係就可以欣賞到西九龍、昂船洲大橋和青馬大橋。

夜晚的時候，仲會亮起欄杆上的特式光管，夜晚來打卡相信都會好靚呀!!

公園入面仲有寵物公園區，如果有養狗仔的你，仲可以帶埋寵物一齊去玩去放電呀~
地方雖大，入面仲可以玩滑板車、滑板、滾軸溜冰等。
所以小朋友進行玩樂的時候，大人都要睇實小朋友，以免碰撞受傷哦。

公園入面設有洗手間，不過廁格唔算多，所以唔好拖到最後一刻先去廁所呀~~<

＊＊溫韾提示＊＊
疫情期間，記得戴好口罩、勤洗手、勤潔手，唔好摸眼、口及鼻，亦唔好多人聚集。
此外，場地近海邊風較大，記得帶定外套，以免著涼。

延伸閱讀：
【簡易食譜】簡易復活節造型小食 破蛋小雞好吸睛 氹食雞蛋＋應節＋影相呃Like

延伸閱讀：
【寵物】罕見情況！倉鼠咬手指後受感染 9歲女發高燒心跳過快險死

Text and Photos: 和牛B的成長日記