【走進夢幻的泡泡世界！九龍灣泡泡樂園BubbleLand】

嘩嘩嘩，新一年，嶠媽又有好去處介紹啦！今次帶左芊嶠去位於九龍灣得寶商場嘅 BubbleLand 玩，因為芊嶠逢星期二都會係得寶商場附近學芭蕾舞，上星期得知 BubbleLand 開張後，今日跳舞前，就帶左芊嶠去玩。

去到門口，就要先登記，登記完著左保護衣先，再戴埋手帶，大人小朋友都要戴手帶架！

入到去有個U型位置，可以把BB車放係到，哩個U型位係唔會有泡泡飛到過來架！細佬留係到就最安全啦！

入面有大小朋友嘅單車，齊齊努力踩踩踩，踩多啲泡泡出來，芊嶠好開心，因為唔識踩單車都好，前後郁個腳踏，都會有泡泡出。嶠媽就好努力踩，踩左一陣就腳軟了。

哩個對於小朋友來講，都有啲難度，雙腳要先踩實，之上下郁個泵，結果泵左幾次都泵唔出泡，芊嶠就放棄左！

哩個區有唔同嘅製泡泡工具，芊嶠玩得好熟練，每次整到大泡泡出來都好開心！

不過嶠媽叻啲，整到大波波出來，又唔係即刻爆！

這個可以拉起泡泡包圍住小朋友，真係大挑戰，戰略係要快手，只要快手拉起，就可以拉到好高，每次爆都會嚇親芊嶠，但佢又會企係中間叫媽媽拉！

這個拉起好似一幅畫像，但由泡泡造成，之後大力一出，亦可吹出美麗嘅泡泡！

來個太空漫遊製泡機，都係要靠小朋友自己一路運動，一路製造泡泡，好有成功感架！

唔少得跳彈床製泡泡機，芊嶠開心到不停跳，啲泡泡係咁飛出來，個畫面好靚，跳到姐姐都要再加泡泡水。

場內亦有唔同嘅製泡泡工具，遍布每一個角落！

哩個跑步機就要小心啦，家長一定要陪同小朋友一齊玩，因為都比較滑，但一樣，製造泡泡滿天飛！

之後可以去櫃臺拎張魚魚畫來填顏色！

填完顏色，可以拎張畫來這部機！

幫條魚魚影返張相，就可以叫佢出動架啦！

條魚會係這個螢幕大海出現，你又見唔見到芊嶠條魚呀？

小朋友可以係洗手位到清潔雙手！

清潔雙手後，就可以去玩撈金魚，每個小朋友都有3個紙網，睇下你又撈到幾多！

芊嶠話我唔識撈，所以用紙撈來撈水。最後我地係一條金魚都撈唔到！

+++++++++++++++++++++++++++++

BubbleLand Hong Kong

地址：九龍灣 得寶花園 地下 TBG mall (牛下新城) T188舖

電話：3709 2004

收費 (按分鐘計算)

平日：小朋友 – $1/分鐘 (成人$25，不限次數出入)

假日：小朋友 – $1.5/分鐘 (成人$35，不限次數出入)

Text & Photos: 嶠媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！