【親子關島遊！與孩子享受陽光與海灘】

響豆少約歲半時，適逢豆媽生日，豆爸就準備帶呢兩母子去旅行～今次想帶豆去下陽光與海灘嘅地方，見聯合航空UA做左個promote，二千幾一個，價錢合理，就決定出走一趟關島～帶住小朋友的確有好多嘢玩唔到，潛水...no, 降傘.....no，老公話唔緊要啦，最緊要阿仔開心，今次就hea下relax 下5日4夜遊關島~

<景點>

《杜夢灣 Tomun Bay》
其實算係今次重點景點，因為豆少第一次落沙灘玩好開心，所以呢幾日都有帶豆去杜夢灣玩玩水，呢個沙灘好靚～水清沙幼，游出少少水底已經有好多魚仔游黎游去，關島市民保護得呢個海洋好好，抵讚～建議帶定浮潛用具前往~

《戀人岬Two Lovers Point》
位於杜夢灣北端突出嘅海崖，相信係每位遊客必到嘅觀光景點～
戀人岬視野極佳，響觀景台上可以觀賞到菲律賓海及杜夢灣全景，門票每人3美金，六歲以下免費，可同日無限次進出觀景台（但我地無咁做）
呢日天氣好好，風景特別靚，我認為非常值得去參觀～

《魚眼海洋公園Fish Eye Marine Park》
若果好似我地帶住小朋友去關島唔能夠潛水，但又想睇睇關島嘅海底世界，就推薦大家可以參觀呢個海底展望台～
呢個展望台同沖繩個個相似，但關島呢個大好多，海底展望台內可以自由走動，而且四周環繞住嘅景觀窗亦較大較多，所以可清楚睇到關島嘅海底美景及多種類熱帶魚群～值得推介
不過費用較高，成人要26美元，6-11歲小童13美元，5歲以下免費

《伊納拉漢天然泳池Inarajan Natural Pool 》
位於關島南部～呢度係當地人假日渡假戲水嘅熱門地點～
由於珊瑚礁環繞隔外海生長，靠近岸邊嘅海水被隔開來形成了天然海水泳池～
其實我對呢個景點確有保留～可能呢日天氣唔好，微微雨，我哋唔覺得呢個係靚景點，只係一個戲水池囉～

另外仲有Cetti Bay Overlook同Fort Santa Hill～可以望望風景，都值得去參觀下～免費的

《住宿》
Sheraton Laguna Guam Resort, 當時房價約1500$ 一晚～
唔算新，酒店有兩個游泳，豆少第一次玩滑板又驚又開心～不過缺點係無私人沙灘

《食》
#超市介紹～
當時豆少歲半，我地仲要煮粥仔比佢食，出發前以為Kmart會有食材可以煮比豆少食，點知原來Kmart係無嘅，只有乾糧，零食，手信類多～卒之比我發現到Sheraton 附近有間Payless 超市，有食材之餘，貨品比Kmart親民，大部分日用品都有，所以建議大家黎兜兜，可能更多發現http://www.paylessmarkets.com/

另外，我地就食左幾間出名嘅餐廳：

#Tony Roma~
美式餐廳，好好食，大大份，叫左一客Robs加意粉加飲品，餐廳先送上一客麵包，show 個apps又送埋洋蔥圈～
可能我同老公係食肉獸，覺得好好食，連豆少試左意粉都愛上瘋狂食～

# IHOP~
食左個靚早，不過其實好一般～

#查莫洛夜市～
呢個夜市逢禮拜三夜晚先會開，都好多遊客～有手信，手工藝品買，最吸引係檔仔串燒小食～唔好睇個樣，其實都幾好食，串燒幾美味～平靚正之選～

#拉麵～
忘記咗係咪店名，關島其實好多日本遊客，所以拉麵都好正宗，好食～

#Capricciosa~
網上個個讚好，不過我地呢幾日去每次都排長龍～無緣食到出名嘅墨魚麵

《租車》
今次租車用Payless ~網址係：http://www.paylesscar.com

出發前網上有人推介，用後覺得唔錯～提供免費接送取／還車服務 ～我地當日凌晨機一早到達機場，先致電租車公司(記得帶定coins),10分鐘內有職員會接送～
今次租車四日只係US115(保險另計）油價亦平，約1蚊1公里～

《上網咭》
關島上網，可以響GPO內Docomo counter買數據咭, 職員會幫你激活埋數據咭, 五天無限上網盛惠US$20
http://www.docomopacific.com/mobile/prepaid

《購物》
個個都話關島好買，不過豆媽都係鐘情日本時裝，所以今趟最大收穫依舊係豆少～值得一提係GPO 內Tommy Hilfiger~男女小童樣樣平～豆少買左好多件Polo裇，計返都係50-70蚊港紙～另外，GPO 內有間ROSS~尋寶一流～我幫豆少響度搵到條靚Levi’s 同AJ tee
另外關島手信必買係Godiva朱古力，平香港一大截，Micronesia Mall內嘅Macy買最平～ 以下整理好幾個關島購物點作參考～

#Guam Premium Outlet :有Tommy, ROSS, 有Docomo counter , 內有playground啱曬放電～
#Micronesia Mall:內有Macy,Gap, foot locker~
#Macy:有Polo, Godiva, 好多童裝～
#Jp store:唔算大，無咩行～
#DFS：買名牌應該好平，不過我無留意～

《優惠》
最後要提～出發前download 呢個apps~ 食飯，買衫，買手信全部有優惠

Text & Photos : 豆媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！