【媽媽最痛】陳柏宇老婆第二胎宮外孕 大量出血切除輸卵管 符曉薇拍片分享：為同路人打氣
歌手陳柏宇和老婆符曉薇（Leanne）結婚3年，兩人育有快滿2歲的女兒Abigail，家庭生活甜蜜溫馨。 日前Leanne上載影片，剖白自己5月時懷有第二胎，但發現為宮外孕，最後需做緊急手術：「醫生話我子宮大量出血，最終決定切除（左邊輸卵管）。」
Photo from Leanne Fu YouTube
已有一女的Leanne媽媽在影片中說道，她一直想為囡囡生多個弟弟或妹妹，5月時發現懷有第二胎，十分開心，怎知期後狂出血及腹部疼痛，看醫生後證實為宮外孕，因BB着床左邊輸卵管導致輸卵管爆裂，最終於6月接受緊急手術切除左邊輸卵管。
Leanne憶述當時情況：「我知道有咗之後一個禮拜，我開始出血，腹部都經常痛，日日都有出血，有時少少，有時出好多血。到覆診嗰日，我腹部好痛，我以為自己盲腸炎，直頭想暈低，標晒冷汗，係超級痛超級痛！」
Photo from Leanne Fu 符曉薇 Facebook
由有BB的喜悅至被逼接受失去小朋友，更要立刻接受手術，Leanne坦言自己心情大起大跌：「好記得嗰日係6月1號，我地緊急入院做手術，醫生話係宮外孕爆咗輸卵管，醫生都有畀我揀切除定修補，上網睇原來好多媽媽都有同樣經歷，醫生亦有講修補咗都比較大機會再破裂，亦見到網上好多人分享真係同一位置宮外孕，所以最終我決定切除（左邊輸卵管）。」
Photo from Leanne Fu 符曉薇 Facebook
手術過後，失去BB的陰霾仍在，Leanne指自己當時心情低落，坐小月期間會不停胡思亂想：「做完手術後諗咗好多嘢，知道無咗後好失望又好失落，好失望係大家咁開心後落空，好失落係我哋真係好想多一個BB陪Abigail，大家有個伴。好記得當時做完手術，我諗BB可能仲喺度、可能只係爆咗輸卵管，我畀咗好多可能性自己…」
Photo from Leanne Fu 符曉薇 Facebook
醫生告訴 Leanne，有過一次宮外孕就較大機會出現第二次， Leanne亦沒有掩飾自己的擔憂：「如果問我會唔會驚咗懷孕？係有嘅，因為有第一次比較大機會有第二次宮外孕，醫生話其實三個月後已經可以再試造人。身體上OK但心態上其實未準備好，聽到人哋叫我地快D有BB會覺得好討厭。」
Photo from Leanne Fu 符曉薇 Facebook
後來Leanne獲一名經歷過兩次宮外孕，最後亦成功懷孕的好友安慰及鼓勵下，漸漸走出陰霾。她更在影片中指，網上有相關經歷的人帶給她的鼓勵和資訊，是她能順利走出來的關鍵，所以Leanne亦決定拍片，將自己的經歷和同路人分享，同時為所有媽媽及準媽媽打氣！
Text：Mami Editorial
Source：Leanne Fu Youtube
【隨時隨地接收更多育兒教育資訊】
📱 立即下載 MamiDaily 親子日常APP
🤱🏻 追蹤我們的 Instagram: mamidaily.hk
🔔 訂閱 MamiDaily 親子日常 Youtube頻道
