【媽媽唔易造】曾為流產自責利嘉兒努力8年終懷孕：幾辛苦都值得！

By Jacqueline on 28 May 2019

Senior Editor

噚日首播嘅TVB節目《媽媽唔易造》，請嚟曾經歷過流產嘅利嘉兒（Lily）做嘉賓，Lily喺節目上分享自己8年嚟嘅求子之路。用盡中西合璧嘅方法，仍然未能再次受孕嘅佢，最後決定嘗試試管嬰兒技術，不過過程甚為艱辛！

曾為流產自責坦言打擊大

36歲結婚嘅Lily，婚後即刻同老公開始造人大計，曾經試過一次自然懷孕成功，可惜大概兩個月左右流產，令佢打擊非常大。Lily指：「咁辛苦終於得咗，點知都未開心完，去檢查嘅時候，仲未檢查到BB嘅心跳。初初會覺得係咪自己有啲咩做得唔好，或者身體有問題，搞到保唔住個BB，後來西醫話好多時候（流產）都係冇原因。」

Photo from 無綫電視截圖

喊住打針：點解要咁辛苦？

後來，Lily用盡中西合壁醫學方法，食藥、針炙所有方法都試過，仍然未能成功懷孕。Lily自知年紀都唔細，於是喺40歲嘅時候，就決定去做試管嬰兒，不過唔單止費用昂貴，仲受咗唔少痛楚。Lily憶述當時除咗要打排卵針之外，仲要每日打薄血針。「打薄血針真係好痛，啲藥會喺肚皮化開，好似打咗毒藥咁，成個肚嘅範圍都會痛，同埋出現瘀青。我一邊打針，一邊流眼淚，嗰刻我問自己，點解要咁辛苦去生個小朋友？」

Photo from 無綫電視截圖

努力8年終懷孕兩公婆起初反應冷淡

老公見到Lily咁辛苦，加上多次嘗試，不論自然、人工懷孕都失敗，認為已經盡咗本分，於是決定放棄，一切聽天由命。直到Lily 44歲，突然出現好消息，Lily終於成功自然懷孕。不過當時兩公婆面對依個喜訊時，反應卻格外冷淡，皆因兩人都不敢開心得太早。Lily憶起第一次真正覺得感動嘅時刻：「去做婦科檢查當日，咁啱係元宵節，正常胎囊係圓形，但嗰陣照出嚟係心形，好得意，感覺肚入面嘅BB係想話畀我哋知佢好健康。嗰次真係好感動，一個活生生嘅生命喺面前，呢種開心係所有嘢都代替唔到，終於實實在在感覺到血脈相連，之前真係好辛苦，好想放棄，不過諗返轉頭，幾辛苦都係值得。」