【沒有十全十美的爸爸，只有盡心盡力的爸爸！】

By 嶠媽 on 05 Jan 2018

近排成日見到好多媽媽可以將豬爸爸隊友，變成神爸爸隊友，我覺得爸爸未必可以成為神隊友，但我知道你一直都係盡心盡力，仲記得芊嶠出世，你每朝4點起身返工，但你知道女兒皮膚幼嫩，所以每朝都會幫女兒浸洗好衫才出門口，每日回家明明很累，但知道女兒爆屎爆尿，污糟嘅衫褲，你都會用手洗乾淨，之後再晾起。

芊嶠每晚都係要人抱住，係咁搖下搖下先肯訓，你都會叫我餵完佢飲奶後爭取時間休息，你抱住佢訓。你知道自己唔識幫個女沖涼，我又驚，第一次沖涼前，就上網勁睇片，睇下點幫個女沖涼，其實最驚係反身沖，你都會用手幫我接住芊嶠，等我唔怕幫佢反身沖涼。

芊嶠大左，我地決定想生個細佬妹，你都好努力同我一齊每日話比芊嶠聽佢好快有個細佬，問佢想唔想，鐘唔鐘意。自從做左ftm，我知道得你一個返工係辛苦嘅，我知道每日你放工返來，仲要陪個女係累嘅。細佬出世後，明明你話會偏心芊嶠 (但一早估到你唔會)，每日返來仍然會比時間陪芊嶠和細佬。

細佬爆屎爆尿，手洗嘅工作你仍然繼續做，雖然你到而家換片嘅功力仲仍然唔係咁好，但我知道你盡左力，每次幫細佬換屎片都驚會整到周圍都係！試過一次幫細佬沖涼，細佬爆喊後就驚左？其實係唔想細佬驚左沖涼，所以唔再落手！但每晚幫芊嶠沖涼嘅重任交左係你手，最好笑每晚都同芊嶠講要淋佢塊面，雖然每次都唔會做，但每次講親芊嶠都會好驚。

我知道我唔算係一個好老婆，唔靚又唔識煮飯，但好多謝你咁多年對我嘅忍耐，我知道做媽媽唔易，做爸爸都唔易，你嘅底線為左我地就改到愈來愈低，我地做咩你都會遷就，雖然你都會成日打機，但我知道你係一個盡心盡力嘅爸爸。你好盡力想同芊嶠friend啲，但芊嶠鐘意就痴你，唔鐘意就推開你，我知道佢嘅說話好傷人，但好彩你仲有細佬。