【兒童心理發展】想BB做個開心寶寶?媽媽分享Happy baby之育成

【兒童心理發展】想BB做個開心寶寶?媽媽分享Happy baby之育成

爸媽分享 育嬰湊仔貼士 bloggers 新手媽媽
By3隻黐媽B on 07 Jun 2020

經常有人說安立寶是個開心寶寶,由出世笑到現在半歲大。最近有個剛生BB的朋友問:安立寶何時開始經常笑?我回想一下,好似一出世就已經是這樣?可能安立寶是個天使寶?不過再認真想想,可能和我十分注重BB嘅的心理發展有關,總括來說育成happy baby有三大秘訣,和大家happy share。

1.滿足BB生理同心理需要
初生BB嘅笑容被稱為「天使的微笑」,其實呢個時期嘅笑係冇意識嘅,多數係生理性微笑,唔係BB自主嘅情緒表達,佢哋如果成日笑,即係代表佢好滿足好舒服,瞓得好食得飽唔熱唔凍冇臭片噏住,先至會舒服到笑。安立寶初生嗰時成日都瞓瞓吓笑到咔咔聲,聽到媽媽冧晒~

到BB大少少,佢哋就唔再淨係食痾瞓,清醒時間長咗,喊又喊多咗,開始識得所謂「扭抱」,其實係需要安全感,呢個係BB嘅本能,當BB喊嘅時候有人立即回應佢,俾到安全感佢,會令佢哋嘅大腦唔需要優先處理舒適同安全,唔需要擔心自己嘅安危,大腦就會有空間去發展探索世界嘅部分,放心咁去成長,對佢身心都有好處。唔需要用喊去要求關注,自然笑多啲開心啲~

2.對BB笑多啲,保持輕鬆心情面對BB
2、3個月開始,BB視力好咗,開始會凝望人嘅樣貌,佢哋就好似舊海綿咁,見到咩嘢就記入去個腦度,繼而模仿人嘅表情,再學習情緒嘅表達。啲BB好敏感,雖然佢哋未識講嘢,但係照顧佢嘅人嘅情緒佢哋係感覺到,你係開心、輕鬆、對住佢笑嘅,佢就會跟住你開心笑。相反,照顧佢嘅人煩躁、堅張、黑起塊面,BB都會感到不安。所以如果自己情緒真係好差,寧願放低佢去冷靜吓,好過夾硬抱住佢將自己嘅負能量傳俾BB。

基本上由安立寶出世開始,只要佢一望向我,我就會即刻對住佢笑,配以輕鬆嘅語氣同佢講嘢,希望佢見到開心嘅媽媽,雖然有時真係攰到面癱,但係只要安立寶一擰過嚟,幾攰都會擠出笑容回應佢,呢個係媽媽嘅堅持。

3.讚多啲BB、俾多啲鼓勵,避免負面說話,令BB喺愉快嘅環境學習同成長
以前嗰代人可能鬧多過讚,但相信新一代嘅教育方式都傾向正向教育,正向教育能夠令小朋友培養自信心,有自信心先會有能力面對呢個世界。試諗吓由細到大做咩都俾人睇死/教訓/比較,自己都唔信自己做得到,咁將來大咗又做得到啲乜?稱讚同鼓勵令BB更願意去做你想佢做嘅事,變相學習能力都相對提高。

我讚安立都讚得幾多㗎,安立寶學嘢學得算幾快,暫時最顯著嘅係喺加固方面,佢肯食我就讚佢叻,食完又拍晒手,令佢好願意自己食嘢,加固冇耐已經識得拎匙羹擺入口同埋用飲管杯,最近仲發現教佢玩玩具佢識得重複我做嘅嘢!營造一個愉快嘅環境對學習好緊要,俾著你返工做咩都俾人鬧或者唔俾你做,你都寧願少做少錯唔做唔錯啦係咪?(笑)

廣告
廣告

順便講吓成日聽到但有科學研究反對嘅說法:

1.唔好成日抱由得佢喊
人類BB比較堅強⋯但只要諗吓自然界嘅哺乳類動物只要離開媽媽,就算有人工餵飼都多數會夭折,點敢由得佢喊⋯BB經常被忽視係會增加嬰兒猝死症嘅風險,好驚呀⋯

2.喊吓對個肺好
BB出世喊係肺功能良好嘅象徵,但之後成日喊其實對佢唔好,生理上會入風肚痛、嘔奶,心理上會破壞佢對人嘅信任。想練肺嘅話其實笑仲有效,不過注意唔好俾BB笑得太勁太耐,會令佢過度興奮過度刺激。

3.BB成日喊係冇安全感
一歲半前其實相反,BB識喊先係有安全感嘅表現,因為佢對主要照顧者(通常係媽媽)建立咗依戀關係,知道自己喊會得到回應,佢先至會用喊嚟呼喚主要照顧者。只要媽媽理返佢就好快收聲,媽媽喺度佢可以同其他人玩,媽媽行開吓佢會不安但不至於喊到癲咗,咁都係安全型依戀,係最健康嘅關係,呢種心理狀態會影響到BB日後交友、戀愛,甚至婚姻、家庭。一歲半後BB就可以同兩至三個人建立依戀關係,通常係爸爸、爺爺嫲嫲公公婆婆或工人姐姐,然後越嚟越多,越早俾佢同多啲人接觸可以令佢嘅情感分散建立,可以接受其他人照顧同社交。

安立而家見親鏡頭就笑,除非肚餓眼瞓,如果唔係基本上任抱唔嬲,最乖係次次見太嫲都好合作,就算瞓咗摷醒佢都笑到見牙唔見眼,同其他小朋友玩、見到陌生人又好開心~真係世界級世界仔⋯XD!希望每個BB都開開心心,成日笑哈哈~

Text,Photo:安立媽媽

Share to Facebook