想炒工人又唔想再中伏!自己上網直接請外傭3大好處+風險

想炒工人又唔想再中伏!自己上網直接請外傭3大好處+風險

爸媽分享 新手媽媽

有得揀先係老闆-上網搵外傭有咩利與弊?(上)

當我內心決定咗要炒印傭阿列之後,我好認真咁諗究竟點樣先可以增加請到好姐姐嘅機會呢?雖然我知道請姐姐有50%係講運氣,咁我點樣可以好好把握餘下控制到嗰50%呢?有朋友同我講「要請一個好姐姐,首先要搵個好中介(agent)」,然後我一共比較咗大約六間agency,傾完之後我發現萬一請姐姐後遇上問題,佢哋都只係安慰下我、同我講係我運氣唔好,比個折頭我揀個新。既然係咁,我不如將運氣賭喺自己雙手?!等agent比人,我不如自己搵?

我一共比較咗大約六間agency,傾完之後我發現萬一請姐姐後遇上問題,佢哋都只係安慰下我。
Photo from MamiDaily

反正係一場賭博,我選擇咗一個很高風險嘅賭博方法,就係自己上網搵姐姐,然後進行Direct Hire。

先講吓呢個方法有咩風險先:

1. 無agent同我跟,萬一請到「極品」姐姐我都只能夠自己處理所有情緒上、金錢上嘅問題,冇人喺中間幫我調解。(但如果信錯一間衰Agency ,其實都一樣無人幫你調解,甚至只係多個人呃你。我上一個姐姐衰到要炒,中間搵agent幫手,佢咪次次都唔耐煩唔得閒。)

2. 姐姐到香港之後,我要自己帶佢去做身分證同埋驗身。

3. 姐姐一到港就直接嚟我屋企,萬一佢有咩傳染病,都係直接入我屋。(我請嗰時未有COVID-19)

無agent同我跟,萬一請到「極品」姐姐我都只能夠自己處理
Photo from MamiDaily

4. 姐姐嚟到香港之後身體有咩問題,係無人會退款/換人俾我嘅。

5. 姐姐係interview時候講嘅嘢係真定假,無人幫我驗證,只能靠我自己去judge。(但經agency一樣有好多假CV)

跟住就講下好處啦:

廣告
廣告

1. Interview嘅時間同次數可以自己定,就算我鍾意朝早9點傾一次、返返下工lunch time傾一次、放工返到屋企諗起啲嘢又再問吓亦得。唔使等agent俾時間我,仲要得個5至10分鐘,只能夠問到啲好膚淺表面嘅嘢,問多兩次又要俾agent嫌煩。

Interview嘅時間同次數可以自己定
Photo from MamiDaily

2. 正因為可以隨時隨地聯絡到姐姐,所以我可以每次用唔同嘅方法問同一樣嘅嘢,試吓佢有冇講大話。例如:我第一次會問「你上一個僱主對你好唔好?」、第二次我問「你會點形容你上一個僱主?」、第三次我問「你上一個僱主惡唔惡?」啲問題唔需要深,對香港人嚟講甚至係廢話添,因為佢答嘅答案唔重要,我問嘅目的係想睇下佢有無前言不對後語,上星期同今星期講嘅嘢有無出入,只要係講大話就點都有破綻嘅。仲要中間無Agent教佢點答,佢只能靠自己Interview ,無得背答案。

3. 既然係賭博,賭仔心態當然想用最低嘅成本換最大收益啦!而家嘅agent fee已經上到$13,000左右,我自己上網揀完姐姐再做文件,$4000有找!就算請咗個衰,我賭三次都仲平過經agent賭呀(講係咁講,當然唔希望衰三次)。

當父母後遇到的困難和壓力源頭
Photo from MamiDaily

另外,媽媽們有無發現啲Agent成日都話無本地完約姐姐提供?但我上網一搵就搵到好多!不過唔係咁啱我心水,啲姐姐好多都趁僱主唔喺屋企就同我視像interview,所以我睇到晒佢哋僱主屋企環境、擺設、相片,甚至連僱主嘅小朋友都上埋鏡埋黎同我一齊視像。有啲又會約我晚飯後視像,佢哋就走出去垃圾房同我傾,我問點解要約得咁急啊?可以等星期日放假先慢慢傾喎,啲姐姐就講到而家份工超地獄,希望我盡快請佢幫佢脫苦海:太太躁狂成日鬧佢、一家6口要照顧無房比佢瞓、婆婆嫌佢煮嘢差喺廚房打佢⋯⋯ 我無興趣知道真定假,亦唔會查證到,不過就覺得啲僱主無晒私隱。(見工講舊老闆壞話真係大忌嚟)

而家嘅agent fee已經上到$13,000左右,我自己上網揀完姐姐再做文件,$4000有找!
Photo from MamiDaily

正因為唔需要等Agent安排,我自己鐘意In幾多個姐姐都得,見得越多就越知道應該問咩問題、咩人品嘅姐姐同自己比較夾,同埋見識到好多怪姐姐,最後好好彩請到而家個姐姐,佢除咗係廚師、家務助理,仲好好咁幫我做埋補習老師,教到將軍識唱識講好多英文。

寫咁多我唔係想話Direct Hire好過經Agent,兩樣嘢各有利弊,只不過想提出多一個渠道比媽媽們做選擇,而且,兩樣嘢其實無衝突,Agent比人你揀嘅同時,你自己都可以上網搵,In多幾個比較多啲自然知邊樣比較適合。

*以上資訊只供參考。

Text:詩寧

Share to Facebook