【新手媽媽心靈加油站】請尊重媽媽對BB的愛＋注意說話對媽媽的傷害

By 蜜柑兄弟成長1+1 on 25 Mar 2020

蜜柑mama, 育有蜜哥+柑仔，喺育兒嘅艱辛路上，幸得蜜哥的甜言蜜語同笑容治癒的柑仔，陪我走過一關又一關。分享媽媽心聲、育兒感動、兄弟成長1+1，給媽媽們一點支持和安慰。【媽媽心事有誰共鳴】Facebook page：蜜柑mama心靈加油站

「哎呀，陰功囉，點解個pat pat咁紅㗎？」

「你唔好一本通書讀到老啦！」

「做咩係咁喺度喊㗎？係咪唔夠飽呀？」

「吓，得咁少奶？都唔夠佢一餐！」

近日見話開拍《BB來了》第二輯，諗起嗰時睇《BB來了》真係勁有共鳴，我記得開頭起碼6集我一路睇一路喊到豬頭咁，除咗我唔係剖腹生之外，基本上大部分坐月嘅經歷同女主角都好似（相信好多媽媽都好有同感，所以套劇先咁受歡迎，最犀利嘅係女主角Ali未生過BB，但都可以完美演活一個新手媽媽，攞到視后真喺實至名歸）。雖然嗰陣已經生咗超過兩年，但由坐月至照顧BB嘅辛酸史依然歷歷在目。

Photo from MamiDaily

劇集開頭提到媽媽生完BB之後因為荷爾蒙嘅變化，所以容易有抑鬱問題。呢個只係其中一個原因，我覺得最影響媽媽情緒嘅係：聽埋好多難聽嘅說話。生完BB之後，媽媽身體已經好虛弱，仲要即刻適應照顧初生BB，一日餵10餐奶，不停掃風，換10次尿片，進入咗一個超乎常人嘅狀態，而且冇覺好瞓，半夜仲要起身餵夜奶。冇得休息，心情都已經麻麻地。加埋一個百日哭嘅寶寶，晚晚喊通宵，真喺想死咁滯。身體嘅攰勉強都仲可以撐得住，但係心靈嘅傷害就真係受不了。喺呢個時候，如果再聽到一d不停挑機嘅說話，對媽媽嚟講簡直係極大嘅傷害。

Photo from MamiDaily

唔好以為新手媽媽咩都唔識，依家有咁多孕前講座、醫院資訊，健康院護士又有教點照顧BB，加埋朋友經驗、網上其他媽媽分享，有咁多專業人士同過來人教路，其實媽媽對餵奶、換片其實都有基本概念，但係嗰d長老就覺得你咩都唔識，要教精你，即使係醫生教你嘅，佢都會挑戰權威，覺得只有佢嘅方法先係啱。

延伸閱讀：
【媽媽心事】為母則強？身心未能平衡媽媽眼淚在心裡流！
BB著咗拉拉褲仲會唔會轉返尿片？2種情況需要轉返尿片

「你呢d (pat pat膏)有冇類固醇㗎？唔好搽落佢度喎！」

聽到呢d說話真係覺得難聽過粗口，睇見自己個仔pat pat紅晒心都痛，但我想幫佢都要強行插手，仲講到我好似想害佢咁，真係無陰功，聽埋咁多呢啲說話令到個情緒變到好抑鬱。

Photo from MamiDaily

你知唔知產假完咗返返工之後要泵奶係幾咁攰嘅一件事，每次泵完都好似虛脫咁，因為要餵夜奶，唔夠休息，又要適應復工嘅壓力，搞到唔夠奶，但係媽媽都已經好努力去泵奶，希望俾到BB多d抵抗力，點知聽到嘅係話你得咁少，真係好大打擊，火都嚟埋。

Photo from MamiDaily

我係BB媽媽，我相信無人會比我更加錫BB同努力比最好嘅嘢佢，如果係善意嘅提醍或意見，我會接受同考慮，但係如果係不停質疑同講刺激媽媽嘅說話真係唔想聽到。成為媽媽後嘅生活都係有血有淚，請尊重媽媽對BB嘅愛，留意你哋d說話可以對媽媽造成好大傷害，亦都係令媽媽容易抑鬱嘅主因，如果唔係鼓勵媽媽嘅說話請唔好出聲。