【生產過程】澳洲公立醫院生產記(一)

豬仔40週足月仍然都未有動靜，助產士同醫生商量之後就決定幫我催生。同屋企人幫豬仔摘左個好日入去催生，不過有時命中註定嘅嘢真係...但我真心好怕催生，因為有機會要食全餐，痛完一大輪又要捱刀，所以入院前幾日我都狂食生冷野同踎低起身，但只係有少少經痛感覺。

其中一個催生嘅原因豬仔老豆成193cm高，怕豬仔愈來愈大隻我會好難生。(豬媽我得157cm咋) 有研究指出好多亞洲媽媽有三份一機會都因為bb太大粒同媽媽太細粒要開刀，如果另一半係外國人的話.

澳洲嘅準媽咪係由住邊區做準則而決定去邊間生仔嘅，除非你俾錢去私院。我就好彩住市中心，被安排去最出名的women’s and children’s hospital (但我生完後覺得唔多掂...)。

我阿媽參觀完都話：嘩仲靚過香港私院嘅！ 有私人產房對住大草地靚景、有私家廁所同淋浴設施、每層有家屬休息室。

醫院都好貼心會提供梳化床俾要同準媽咪過夜的家人，呢樣香港就一定無得比較啦，因為土地問題。

但當時嘅我係完全無心情去欣賞間產房，只係希望快點完。

我以為我一路都算好active，翻工翻到最後三個星期，加上我地日日都一係喺藥房企一係周圍行，仲諗住幾個鐘仲咇到個b出來。

生bb之前我都一路有做下research大概俾自己有個心理準備下生仔究竟有幾痛，自問都算幾忍得痛掛，試過紋眼線、經痛亦忍住唔食止痛藥咁。

點知一訓低就係惡夢嘅開始...

Text & Photos: 新手媽咪手記by吾係阿化