【新手爸爸】豬隊友進化做超能爸爸 唔使乜都搵媽咪跟進！

媽咪～ 玥玥肚餓，要餵奶呀！

媽咪～ 玥玥屙「poo poo」，要換片呀！

媽咪～ 玥玥「打嗝」，要掃風呀！

媽咪～ 玥玥嘔左奶，要換衫呀！

以上係玥爸未進化成為神隊友之前聽得最多既說話，可以話係媽到你心都煩埋！曾經內心埋怨過「點解咁簡單都唔識」、「少少野都做得唔好」、「十個你不如一個我」。但其實咁樣對自己身心唔健康之餘（坐月果陣仲大喊過），對方真係唔知你做乜，無啦啦躺著也中槍，又點敢再幫手。

事隔兩個月，無論餵奶、掃風、換片、換衫，呢位豬隊友都開始得心應手，進化做超能爸爸，已經唔再需要乜都搵媽咪跟進。其實育成神助手唔難，秘訣不外乎以下幾點：

了解問題同理解
其實初時玥爸覺得BB仲細，軟腍腍。始終媽媽細心，男人粗手粗腳唔敢幫手餵奶同掃風，怕一個「排雲掌」就拍暈BB。當你了解咗對方諗法，就唔會覺得佢咩都唔想幫手做。

勿抱怨，要求太高
好多時媽媽嘅重心去哂BB度，會忘記對方都係個新手爸爸，好似佢乜都要識做，做到亦好應該! 其實玥爸初時雖然無餵奶，但背後都默默地幫手洗奶樽、奶泵、洗BB衫。之後的事都係慢慢嚟啦！

多鼓勵
回想當時玥爸第一次見到玥玥，連抱起佢都唔敢，幾番鼓勵之下先可以鼓起勇氣用僵硬的身體加90度角的肩膊抱起軟腍腍嘅玥玥。

多啲讚美
當玥爸開始嘗試餵奶，試過幾次幫玥玥掃風都唔成功㗎。當佢第一次掃風成功，即刻用誇張的演技大讚「爸爸，好勁呀」。 （其實我係真心讚㗎！）讚下佢，佢有滿足感，下次再做相同嘅事咪自然會有自信！

最重要一點，亦係玥玥教媽媽要記住，千萬不要忘記懷孕期老公對自己的呵護，要多一份感恩❤

依家到媽媽大叫：「爸爸! 餵奶奶啦!」 ψ(‵▽′)ψ

延伸閱讀：
【卸貨記錄】屯門醫院48小時食盡全餐生產記（上）
【卸貨記錄】屯門醫院48小時食盡全餐生產記（下）

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
Text & Photos：玥媽 Hey

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到：[email protected] 我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！