【環保尿片】重用尿布慳錢之餘 減廢又可以防敏感（附清洗小TIPS）

話說包爸包媽有自己愛巢之後都有做下垃圾分類、用下環保飲管、婚禮時參加剩食回收，算不上環保分子但都想出一分力。陀住包包時都諗點樣可以製造少啲垃圾呢？

除咗喺屋企時用乾棉整濕換片代替濕紙巾（濕紙巾唔係紙嚟架真係⋯）其實個名叫「紙」實質係「膠」，尿片先係最誇張！

初生一日換8-12條片片，包包依家8個月大，一日大約都要換6-7次，一年差不多要用3000條紙尿片！全部都係膠，大家諗下到底要幾多年先分解得晒⋯⋯

大肚時行BB展，發現香港原來有環保尿布～

媽咪成日話我細個都係用尿布，但係～咦！設計咁靚嘅

原來宜家嘅尿布已經新潮兼方便好多，當時同包爸停低睇咗一陣聽講解，不過時間尚早唔敢出手買住就離開會場啦。雖然當時無入手，但呢樣產品一直喺包媽心底。

到包包出咗世，初生時期真係焦頭爛額到一個極致，淨係換片餵奶已經用盡氣力，到接近2個月先慢慢上手。8月行BB展又再遇見環保尿布，喺包爸唔多睇好下，包媽輕輕入手2套試用裝，睇下用落O唔OK先，要放棄都唔好製造咁多垃圾呀嗎～

好多媽媽想試用尿布，阻力都來自家人，不外乎話「唔方便」同埋「好難洗乾淨」，暫時包媽用咗尿布5個月，輕輕分享一下用家感受～

方便度：當然紙尿片著完掉左佢當然方便啦，但尿布又係咪真係咁麻煩呢？以我最先入手嘅牌子為例，佢嘅魔術貼設計同紙尿片基本上無分別⋯⋯

魔術貼設計同紙尿片有9成相似，所以新手使用時好易上手！
最開心係感染埋老公，以及主力湊包包嘅爺爺嫲嫲都肯用！清洗工作基本上我放工會處理，湊BB時佢地只需要清潔、著同除。對於佢地工作量無增加，自然容易接受！

家人換片後直接放入防水袋，拉埋拉鍊隔味，夜晚包媽放工一次過清洗

清洗方法如下：（有便便圖慎入）

1.有便便先用花灑沖走先，無便便嘅就唔使理～

2.全部先放入機用最短洗程pre-wash過水，目的係過水一次洗走尿味屎味，包媽嘅洗衣機最少係14分鐘

3.再同其他衫一齊用40度水棉質MODE開機，大人或BB衫都可以

4.便便跡通常花灑沖完再洗衣機洗已清走大部分，仲有黃的話曬太陽就可以消除～萬一真係有頑固便便跡，可以加少少檸檬汁再曬太陽，乾咗正常洗多次再著就ok！

上面係未清洗，下面係花灑沖走便便影，其實只係得返少黃印～～

如果真係好介意便便放喺防水袋成日，可以用呢種即棄隔便墊，可分解物質總比膠嘅尿片環保！

但記得有4大千祈唔好做嘅事：

1．唔好浸（會滋生細菌）

2．唔好用梳打粉（會塞纖維，令片芯唔吸水）

3．唔好用手洗（唔會乾淨過機洗＆洗衣液殘留容易紅pat pat）

4．唔好用BB洗衣液（潔淨力不足）或任何含柔順劑嘅洗衣液／球（會塞片芯纖維致吸尿量減低漏尿）

另一樣成日被Challenge嘅---「慳得幾多啫﹗」

我地一齊計計數啦：

初生換片一日8-10塊，慢慢長大都大約要一日換4-6次

初生尿片約$1@，L碼片一般約$2@

我地取個大約數，一日換6次片，每塊$2

30日6次$2=$360

10個月都$3600

如果係大隻B，加大碼片就更貴，要$3一條

30日6次$3=$540

10個月就$5400

未計更貴嘅拉拉褲⋯⋯正常返幼稚園2歲前後戒片，計一計其實講緊全紙尿片都要用過萬蚊﹗﹗

包包宜家會自己揀尿布著～哈哈哈

而尿布呢？包媽暫時有13條尿布，用咗千幾蚊左右，基本上已經可以用到戒片！所以有朋友就算喺BB一歲先開始轉用環保尿布都唔會蝕～

尿布仲有好多花款，呢條牛仔褲款夏天就咁著都唔失禮﹗
只要係日日用，呀B愈大隻就愈抵用，當然就愈早就會慳得愈多！
轉咗尿布之後包包無再紅PAT PAT，每次換片摸下，屁屁都係乾爽滑一滑！對愛錫BB嘅父母嚟講，應該都係一大誘因，不妨入手兩條試一試啦＾＾有時間再同大家分享下更多尿布經啦！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：包媽雲妮

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！