【生產記錄】QE生第一胎 3.5小時超快產程生產記

By 安妮媽媽親子日記 on 31 Jan 2020

我是一位全職媽媽和孕媽媽。是一位喜歡手作，購物，旅遊，食，買，玩的媽媽。最有興趣為仔仔搵最好玩，最抵買，最好食的各種好東西，希望他能在充滿幸福快樂的環境下成長。

＊2017年3月＊

零晨5點從夢中驚醒，夢見自己穿水，醒後發現原來真係已經穿左水，即刻叫醒老公。
老公扶左我落床後，羊水不停流出，開始見紅，情況真係好狼狽，要用好多毛巾墊住地下，叫醒埋奶奶後就執拾好入院袋。
打電話通知媽咪，同老公落樓搭的士去QE。
到醫院時直接去B4產房，老公幫我落去登記入院，媽咪係出面等我。我就入去做檢查，磅重後訓上病床，聽BB心跳，放鴨咀做內檢，好痛！檢查好哂之後姑娘叫我去C2產前房。

執好行李就準備過產房，有個姑娘帶我過去，姑娘叫左老公係出面等我。入到產房門口先對名字、探熱。之後就上床駁胎心機，睇住班助產士係我隔離好忙咁，睇數據、寫記錄，我就開始覺得好驚，驚到雙腳不停咁震，個實習姑娘見到我咁驚就不停安慰我，叫我放鬆，但我真係放鬆唔到，係咁震⋯⋯
半個鐘之後，醫生入黎檢查，幫我人手穿水，原來人手穿水係唔痛的，只feel到有一大攤水係下體再次流出，姑娘幫我墊好床墊。之後醫生話開始幫我落第一次嘅催生藥，同我講因爲我係第一胎，陣痛時間會係8至10個鐘，開頭會10至15分鐘痛一次，如果催生唔成功就要開刀，果刻真係勁驚，超唔想食全餐！

隔左陣，老公就入左黎陪我，我個心好似當堂安心左好多，見到個熟悉的臉孔都無咁驚！姑娘教我聞笑氣，話我一覺痛就可以用。初頭都頂得住，無用到，仲可以同老公傾下計。點知幾個字之後陣痛開始加劇，差唔多5分鐘痛一次，同醫生講嘅10分鐘一次差好遠囉！痛楚都慢慢增加，有時傾傾下計都會痛到要聞笑氣，但都頂得順。
一個鐘之後痛楚再次加劇加密，已經痛到講唔到野、不停聞笑氣，聞到頭暈眼花，有時痛到自己都放唔到個機去個口度，要老公幫手。老公仲話見到儀器上的顯示，知道陣痛已經去到80，幾分鐘一次，但我已經無力回應⋯⋯

突然姑娘入黎話對面床有產婦要共用產房，叫老公出去先，要問下個媽咪願唔願意俾老公陪我，我聽到真係勁唔開心！果刻好想喊，好想叫老公唔好走，好驚之後的時間要自己一個捱落去！
老公出左去之後，助產士又再幫我落第二次的催生藥，之後陣痛又再加劇加密，已經去到2分鐘一次，有幾次痛到真係想喊出黎，成條尾龍骨、成個肚都勁痛！勁痛！咩姿勢都無幫助，笑氣都無幫助！助產士見我咁痛就話幫我打枝止痛針，但原來枝止痛針係勁廢的，一啲作用都無！

隔左陣有幾個醫生入黎，其中一個幫我做內檢，我果陣已經痛到暈暈登登，連笑氣都忘記用，要個姑娘幫我！呢次內檢真係超級無敵痛！feel到醫生成隻手係入面係咁摸，痛到大叫！但好消息係醫生話我已經開到6度，仲話我嘅陣痛好規律好密，佢地唔走住，睇多我兩次陣痛先。兩次陣痛後醫生再幫我內檢，又係無敵痛痛痛！今次醫生話已經開到8度，可以試生！我隔離個助產士好驚訝咁問我第幾胎？我答第一胎，佢話我的產程都幾快！

姑娘好快速將我張床變做生產床，拎走左部笑氣機，幫我插氧氣管係鼻，之後將我對腳放上腳架，叫我試生，我果刻突然好清醒咁不停問：「我老公呢？」「佢可以入黎未？」姑娘話已經通知左我老公，叫我先加油！

醫生叫我一feel到陣痛就用力，教我點用力，但我果時已經痛到咩都聽唔到，用錯哂力，俾醫生打左一下大脾，叫我望實佢睇佢示範，我真係覺得好無奈。試左幾次就見到老公番左入黎，佢坐係我隔離幫我打氣，教我用力。
唔知試左幾多次後，突然全個產房的姑娘變得開始緊張，有個助產士坐係我前面，其他姑娘幫我係下半身放上綠色的消毒布，更提醒我地唔好掂到，我突然feel到下體俾人打左枝針，我諗應該就係麻醉針，之後要剪會陰，但我個肚已經痛到感覺唔到俾人剪左。
陣痛再次黎，助產士再次叫我用力，我每次都要出盡全力去all，仲要時間越長越好，開始聽到姑娘話：「已經見到BB頭仔出緊黎」果刻我更用力，好想快啲生出黎！
最後一次用力時，助產士叫我出盡全力唔好唞氣，我feel到好似有一大舊好硬嘅頭出左黎，之後就係好滑嘅身體，生左出黎真係成個人鬆哂！

因為對面床嘅媽咪要生，所以老公快速睇左BB兩眼之後就俾人趕左出去。助產士將BB放係我眼前，問左性別之後就幫BB抹身。

之後幫我按肚排胎盤出黎，按左幾下勁痛勁大力之後胎盤就滑出，原來胎盤係咁大舊的！
姑娘將BB放係我心口肌膚之親，BB好溫暖好細粒，見到BB係我面前真係好想喊、好感動！之後半小時就係鏠會陰時間，雖然打左麻醉針，但都覺得好痛，又會feel到啲線拉黎拉去，但有BB陪伴已經無所謂了，痛就痛吧！
傷口處理好後，老公就再番入黎產房陪我，姑娘幫我地影左第一張全家福，老公又幫仔仔影左幾張相，姑娘幫仔仔檢查磅重，仔仔重6磅3。