【BLW】嬰兒主導斷奶好處多 由孩子做主導 無視別人的質疑

睇張相一定以為肥仔嘜係一個行BLW好叻嘅小朋友，其實呢舊粟米同紅蘿蔔背後都幾辛酸～BLW呢個名相信好多人都認識，Baby Led Weaning（ 簡稱BLW）嬰兒主導斷奶嘅飲食方式， 簡單嚟講即係將食食物嘅主權交去BB手上，由BB自己用手將食物放入嘴，一個由自己幫自己進食嘅一種技巧。

我係二寶媽，家姐BLW行得唔好，進行BLW幾個月之後最終都唔成功，主要原因係外來壓力同本身佢唔太願意嘗試新食物。吸取咗經驗之後好想呢一胎可以順利進行，原因係－我得一對手，好難同時餵兩位小朋友食飯。另外BLW又可以同父母一齊食飯，唔洗另外煮飯仔俾佢，因為準備BLW食物多數都係蒸同烚，等小朋友可以食到食物嘅原味，只要將食物整到軟身、形狀容易攞上手就可以。

BLW 除咗可以幫助小朋友發展，訓練大小肌肉之外，亦可以培養佢哋對食物嘅興趣，全個進食過程由小朋友做主導，父母唔會參與，所以我都好想俾肥仔嘜試下。

進行BLW成日會聽到有人話：你舊食物太大啦，你啃死佢啦呀；食到周圍污糟邋遢；佢係咪唔想食；佢係咪未準備好；你咁樣餵跌晒落地呀，不如唔好食等等⋯⋯呢啲說話！其實作為媽咪又點會想整親自己既小朋友又或者點會想佢食唔飽。行BLW嘅媽媽真係好需要一份堅持同勇氣，當全世界嘅人都唔明白你嘅時候，為咗小朋友，你都會硬住頭皮去嘗試同執行。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：禧。熙。之生活點滴

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！