【BB作息】不同年齡階段的寶寶睡眠時間表

每個月齡嘅寶寶都有佢自己嘅作息時間，越大年齡嘅寶寶訓得會越少，相對佢地活動量又大左，所以各位媽媽們快啲睇下自己仲有幾多休息時間啦（哈哈～）

初生至2個月

新生嬰兒係唔識得分白天同晝夜嘅概念，寶寶只知道一日24小時食奶同訓覺，咁先可以正常發育同成長。新生嬰兒一日需要訓16-18小時；每次都可以訓2-4小時，然後餓醒大喊醒來。剛開始嘅時候，新生嬰兒會不分晝夜咁食奶，但係慢慢地會發現佢晚上係訓得多過白天嘅時間。

2至4個月

依個月齡嘅寶寶每日平均訓14-16小時，大部份睡眠時間都係晚上；白天一般都會訓3-4次，因人而異。

4至6個月

4個月齡嘅寶寶晚上平均訓10小時；白天會訓2-3次。依個時候嘅寶寶開始認識早上同晚上嘅分別，所以最好嘅依個時候幫寶寶建立一個固定模式，維持每日日間小睡同夜晚相同嘅就寢方式。

6至9個月

6個月齡嘅寶寶晚上平均訓10-11小時；白天上午同下午各訓1次，每次約1-2小時。6個月嘅寶寶大多數可以一覺訓天光；而且開始吃嬰兒副食品，飽足感較充足，依個階段寶寶睡眠週期都變長，爸媽可以俾寶寶學習自行入睡，增加寶寶嘅依附感，俾孩子夜間睡眠更安穩。

9至12個月

9個月齡嘅寶寶白天訓2次，白天上午同下午各會訓1次；晚上平均訓10-12小時。你會發現依個階段嘅寶寶有個睡眠問題，就係會半夜醒來，一係坐係張BB床度依依哦哦，一係企係度，等你回應佢。因為佢習慣左係大人懷抱中入睡，所以半夜佢都想要相同方式依附住大人。所以爸爸媽媽們係依個階段會唔夠訓，因為要成晚起身安撫訓係BB床嘅寶寶。

1至2歲

1歲寶寶晚上訓10-12小時，白天再訓1-2次，每次1-2小時，而且你會發覺孩子下午小睡時間慢慢縮短。

依個階段嘅寶寶活動力十足，活動量增加，難免會有睡前掙扎唔肯訓覺嘅情況，爸爸媽媽們可訂立就寢時間，建立好固定的睡眠儀式，養成孩子規律嘅睡眠習慣。

2至3歲

2歲嘅孩子好鐘意挑戰父母嘅規定，關於上床訓覺依啲小爭執係依個階段好常見。制定就寢時間嘅常規同儀式係鼓勵良好嘅睡覺習慣同俾孩子有安全感嘅最好辦法。2歲嘅孩子大約白天會睡1-2小時，晚上訓10-11小時，建議晚餐後可減慢節奏，讀書、唱歌或玩啲靜態嘅遊戲，避免孩子係訓前太興奮而訓唔著。

3歲後

孩子越大就越唔需要訓晏覺，而且晚上嘅睡覺時間會減少。大部份適齡嘅學童都已經學識自己重新入睡，而且佢地會發夢，所以家長們要小心監察小朋友睇過咩影片，尤其晚上睇嘅影片；因為小朋友可能會因而發惡夢同難以入睡。

以上數據都只係參考，每個小朋友睡眠質素同時間都唔同，所以大家輕鬆面對就可以。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：孖吉的成長日誌

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！