【家族旅行】香港本地小旅行 更可帶著寵物入住 共享家庭樂

【家族旅行】香港本地小旅行 更可帶著寵物入住 共享家庭樂

爸媽分享 親子玩樂 本地遊樂 bloggers
By米豬媽媽 on 01 Jan 2020

過去嘅聖誕假期,我地去咗一次家族旅行啊~ 雖然今年都有同老爺奶奶去旅行,但姑仔同三筒都冇去,嚴格來講都唔算係家族旅行,所以趁聖誕個個都放假,姑仔就Book咗酒店同成家玩返晚~來一個小旅行

今次Book嘅酒店係一間新嘅五星級酒店,而且仲要pet friendly!!喺舊新世界中心(我的少女時代第一份工嘅office)嘅位置,即係 - 尖沙咀 XD

係呀~成家大竇帶埋隻狗去尖沙咀住一晚呀XD 因為可以全家一齊先至係真正嘅家族旅行 <3

註:我未去到酒店都唔知我地去邊間XD 所有野由妹妹一手包辦,我只係提供咗全家個名比佢咋XD 唔該晒妹妹~ <3

Check-in當日下晝2點零就有車嚟接我地喇~妹妹Book房時已經要求係connected room,而且仲有車接我地tim~初時以為係架7人車走2轉,點知原來係2架私家車,分別去我地屋企同老爺屋企

超體貼地set埋car seat比米豬,呢位小朋友仲幫佢架靚車搵咗個靚位泊好佢

唔駛半個鐘已經去到酒店喇~

喺lobby已經有接待我地嘅管家等緊我地喇~不過老爺架車未到,我地就周圍行吓先

等咗5分鐘老爺奶奶妹妹同三筒都嚟到喇!

緊係立即上房啦!米豬同我都好期待呀

呢度嘅connected room同我想像中有d唔同,我心目中嘅係兩間房喺隔離,中間有道門可以互通就叫connected room

但係呢間酒店嘅connected room就係兩間貼住嘅房,房門外再有個小玄關,有另外兩道門通去common area走廊,只要我地閂咗出大走廊嗰兩道門,又開住我地兩間房嘅房門就可以兩間房通行無阻喇~米豬同三筒最開心啦,行咗都唔知幾多轉⋯⋯

廁所同衣帽間啲門打開晒後係可以打通晒成間房,仲有好多好多好多鏡,米豬同三筒左行吓、右捉吓,玩得超級開心~酒店都非常細心,安排咗BB浴盤、腳踏同洗護用品

話明pet friendly,當然唔小得三筒專用嘅物品啦:有張超舒服私家床,仲有糧食同水兜,同埋尿片!

連餐飲都有包㗎~!呢個就係可以喺menu揀嘅寵物餐單喇

雖然係pet friendly酒店,但係暫時所有餐廳都未開放比毛孩進入,所以如果想同毛孩一齊開餐就要叫room service送上房

check in完正值tea time,40樓serve緊下午茶呀!緊係要上去食吓啦,我地package包咗無限access,會serve light lunch、tea、dinner、supper同埋早餐,基本上你唔想諗食咩的話,上去就啱喇

除此之外仲有唔同嘅娛樂設施,例如象棋、 card game,仲有得督波,同埋有酒吧~冇記錯的話夜晚8點前叫酒都係唔會額外收費㗎

可以望住無敵海景,仲有咁多精緻嘅甜品同小食任我揀!

要咗2件咸點、2件甜點~再點咗一壺我最愛嘅earl gery。因為係老公同我上嚟先,所以我係可以 安 靜 優 雅 地 嘆咗20分鐘下午茶~

此刻。無價

好啦我無價完喇⋯⋯

米豬上到嚟好開心呀,係咁痴住隻窗望中環,其實可以行出去㗎,出面係露台,但我地上去時好大風又有啲雨粉就冇同佢出去了

爸爸帶佢出去拎野食,呢位小朋友拎咗⋯⋯

食完野就過去玩吓,咁大個仔第一次督波波!睇爸爸表演清枱,但佢好似貓咁,係咁執啲波放入個袋度XD

然後在酒吧chok

食飽飽就返咗房,有個小朋友見到咁大個浴缸興奮到不得了,要我快啲同佢沖涼!

同米豬沖緊涼時先發現原來有埋兒童浴袍㗎,幾大都著吓先!配埋對兒童毛毛拖鞋,好舒服呀

我地上去食野時,酒店已經幫我地加咗張細床喺大床隔離,米豬今晚就訓呢度喇!

廣告
廣告

呢位小朋友沖完涼嘆奶中~

但係15分鐘後⋯我就比呢個暴徒從後偷襲XD

既然唔訓,就又喺房四圍跑啦!反正間房點都通,點知跑到6點,呢位小朋友同我講好肚餓要食奶奶

唔食奶奶啦,又上返去食野先!因為6點已經開始serve dinner喇

有廚師即煮拉麵,米豬見到人地大大碗菇放喺度,即刻同廚師講「我想食mushroom麵麵」 廚師叔叔就好快手咁煮比佢食喇,係一碗啱晒小朋友份量嘅mini拉麵~

順便又拎咗啲餅餅,姐姐又比咗杯橙汁佢,發達啦!

酒店提供嘅兒童餐具有恐龍圖案,米豬又玩咗一輪先食。

食飽飽已經7點幾,我地又返咗落去房同老爺奶奶、妹妹傾吓今晚食咩。既然三筒唔入得餐廳,我地就叫上來食啦~20分鐘到餐車已經喺我地房出現喇

set好晒就開餐嚕!

我地叫咗3塊牛扒、燒雞、炒米粉、燉雞湯、龍蝦湯、黑松露薯蓉、糙米飯同薯條

食物質素都幾好啊,黑松露薯蓉同埋個牛扒好好味!烤雞又好juicy,不過老公話個龍蝦湯好似酸辣湯咁XD

食飽飯再同米豬玩咗陣,又沖多次涼,暗咗佢訓,我地就 自 由 喇

同老爺奶奶妹妹三筒connected room,緊係賣甩個仔,同老公上去飲吓野、拍吓拖、傾吓計啦

再配埋無敵維港夜景~perfect池~!!

飲完野就落去帶三筒去吓廁所,係啊~pet friendly吖~係有地方放狗㗎

三筒姐表示快啲去完我要返去瞓覺豬

由於太hea嘅關係,大家未到12點已經瞓晒~直到第二朝8點半我比米豬嘈醒我沖奶(比起喺屋企5點morning call已經係好大恩賜)

食完奶做乜?緊係到我地上去食早餐啦,有粥、又有廚師即場煮奶奶、又有粟米片、又有包包、又有點心~總之就唔會餓親啦!

順帶一提,部lift有櫈㗎XDDD 雖然好快到我地要去嗰層,但每次入lift米豬都會好努力咁爬上去坐幾秒XD

我地食咗一陣,老爺奶奶同妹妹都上來了~~米豬就扮頭先啲姐姐問佢地飲乜野XD

呢位小朋友繼續食mushroom⋯⋯炒mushroom同埋粟米脆片~staff very nice~幫我㷫熱咗半杯奶比佢送粟米片,唔駛用凍奶

嗚呀我呢壺朱古力超正呀!!!(飲呢壺朱古力前,仲飲咗一壺earl gery XD)

食飽之後又去咗督波~ 我同老公督XD 玩完已經10點半,返落房hea多個零鐘要走喇⋯⋯嗚⋯⋯我唔捨得呀⋯⋯

米豬過咗去同三筒玩,我幾大都戀多陣張床先!!喺屋企哪有呢種戀床嘅權利呀?!差唔多12點我地就落去check out喇,再過K11 Musea行一陣~

三筒可以借汪汪車坐呀!第一次坐汪汪車有啲緊張,不過米豬好乖呀,喺隔離傍住佢

第一次嚟呢個商場感覺一啲都唔似香港(講緊裝修),好似以前行過一個喺Pattaya嘅商場咁,有帶小朋友嘅你地千祈唔好錯過B1-B2有個好大嘅play area,遲下仲有lego discovery centre,超級期待呀!

行完商場就返酒店拎返行李call車走嚕~走嗰陣米豬同三筒都極唔想上車,2個都要我地夾上車,架車開走時米豬仲不停咁話「媽媽,我唔捨得呢度呀,我唔想返屋企呀」
真係好想應佢:「仔,我都唔捨得呀⋯」今次呢個2日1夜家族之旅就喺2個小朋友極唔捨得嘅情況下完結嚕。

總括嚟講服務真係冇得彈,由妹妹落Booking嗰下開始已經係超貼心服務,安排車時見我地有小朋友,特登問埋駛唔駛安排car seat比米豬;上到房又見到好多kids friendly嘅設施,例如個腳踏;上去食野時自動提供兒童餐具不特止,我唔記得帶較剪,問佢地借較剪,點知個staff即刻叫廚師剪完再煮比米豬,真係好貼心呢~為咗唔好浪費碗麵,冇剪嗰碗比咗爸爸食XDD;每次見到我地都會問我地三筒住得開唔開心,有冇咩野需要幫我地添置,真係幾窩心~希望下次再有機會嚟住啦!

==============================

Text & Photos:米豬媽媽

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

Share to Facebook