【初生攝影】為BB影初生相做好準備

By 晞怡媽媽 on 22 Dec 2019

我叫晞怡媽媽，我係全職媽媽黎架，女女叫晞怡，今日剛剛9個月大，有4隻牙仔，想籍住親子日常分享一D有關湊b女既心路歷程，可以分享bb食咩零食、用咩產品、bb成長過程等等，剛剛10月25日仲一家三口去台北旅行，仲可以分享一下旅行用品同行程。

幫唔幫小寶寶影初生相好呢？

晞怡仲喺肚入面嗰陣，我上網都睇咗好多關於初生造型嘅相，每間公司都有好多唔同造型，好多都好可愛，心郁郁想幫晞怡影返一輯靚相留念。最後選擇咗一間價錢合理，拍攝時間係1.5小時，冇限制造型（一般可以影到4-5個），仲會全部相都會畀返哂我哋，如果中間BB飲奶奶係唔會計時嘅，加埋狗狗一齊影都唔需要俾附加費。因為當時做緊優惠仲可以加錢做埋一本20張相既硬相簿，連埋攝影師上門來回車資（gogovan），一共用咗$2290。

注意事項：

如果決定要影初生相既話，愈早預約會比較好，太遲預約的話好多攝影公司都會full booking，我大約係24週就預約左攝影師，佢地比左一個拍攝日期我先，係預產期後14日。

＊一定要問清楚拍攝日期係唔係可以免費更改，因為預產期未必一定係BB出世嗰日架！

晞怡就38週1出世，因此我就改咗bb出咗世第18日影（建議BB出世後 8至20日進行拍攝。因為呢個時候BB嘅身體柔軟，可以為BB試唔同嘅造型。只要BB食飽飽、換好尿片就會瞓得好冧，呢刻就係影BB初生照嘅最好時機！)

另外，所有拍攝時間、有幾多造型、加寵物或者加屋企人要嘅費用、附加費都要問清楚最好就留底，如Whatsapp紀錄。如果要俾訂金都要留底架，萬一有咩事都有紀錄做證據丫嘛(●°u°●) 」

最後，拍攝初生照時要準備暖爐同奶嘴，開暖爐就係唔想BB凍親，而奶嘴就係當佢扭計嗰時氹佢用嘅o(^▽^)o

＊＊準備落訂金時，要注意條款細則，譬如：講定約預產期後20日內拍攝；如果BB好似我咁38週已經出世，可以免費改拍攝日子；有幾多套造型可以拍攝；例如要加屋企人要唔要加錢；如果要寵物一齊影，要問清楚價錢同埋攝影師影唔影啊(=ﾟωﾟ)ﾉ最後當然要問清楚你可唔可以攞返全部相同埋有幾多張係修輯左嘅相畀返你啦！