【孩子自理】教好孩子自理能力+良好態度 原來有秘訣!

【孩子自理】教好孩子自理能力+良好態度 原來有秘訣!

爸媽分享 教育路 湊仔經
By我愛攣毛哥 on 25 Nov 2019

毛爺學識左去完街自己除襪同自己放好對鞋,我真係好驚訝~13個月大的毛爺可以做到!
已變成慣性動作*次次都做到(已經持續左一星期了)



我發現係有秘訣的~容許我呢個新手媽媽分享一下點教識毛爺自覺除襪放好鞋

要由某天去完街講起:
話說一星期多前帶左毛爺落公園放電,玩左1個鐘毛爺扭眼瞓+捽眼,我就抱住無嘜電的毛爺返屋企
返到屋企幫佢除左對鞋 *見佢識自己除襪就叫佢自己除襪
我:Anson,你自己放番好對鞋
(毛爺走佬⋯⋯)
我再三請毛爺自己拎起對鞋放好佢,毛爺終於肯過黎拎起對鞋,好唔容易引到毛爺行到自己的鞋櫃前
我:放對鞋係呢度,呢度Please~(指住個放鞋位置)
(毛爺發脾氣掉對鞋落地)
我對住毛爺微笑,慢慢坐落地下,慢慢同佢解釋
我:你對鞋應該要放係鞋櫃度,而唔係掉落地上面
(毛爺唔聽,再掃跌多兩對鞋落地)
我:哎喲!啲鞋比你掃跌左,你執番好佢啦~
(毛爺唔耐煩開始喊、要走)
(比我塞住左條路)我:Anson你要執番好啲鞋先可以走
(毛爺爆喊+試圖強行逃走)
我:Sorry Anson!你應該執番好啲鞋先可以出去架
(毛爺爆喊、喪喊、勁扭)

孩子自理 - 爆喊、喪喊、勁扭
Photo from MamiDaily

糾纏時間終於黎(**亦都係關鍵時刻)
我知道如果好好利用呢個時刻,咁就可以一勞永逸,令佢真正學識做好呢件事,而且佢又有滿足感、成功感
❤秘訣1:一定要好好控制自己的情緒,唔可以嬲/煩躁,因為你嘅情緒係直接影響緊個情緒唔穩定的小朋友,態度要溫柔先可以平伏到佢嘅情緒同佢心中嘅慌張
❤秘訣2:立場一定要堅定,無論佢點扭/點喊/點發脾氣,都一定要佢自己完成呢件事,比佢知道媽媽定下嘅立場係唔會變,但自己一定唔可以發嬲!

 

我攬住爆喊中的毛爺講:無事無事~媽媽係度
(毛爺攬住我放聲嚎哭)
呢個時候Auntie Nancy經過,毛爺如見救兵 *喊得更大聲
醒目嘅Auntie Nancy扮睇唔到,行開咗
毛爺已經喊到成頭濕哂,面紅耳赤口水鼻涕都飛哂出嚟
我:無人會救你架啦⋯你放返好啲鞋咪無事囉
(毛爺行去鞋櫃再掃多對鞋落地)
・緊記唔好嬲、唔好鬧(試探緊你嘅底線,嬲就中計了)
我:哈哈,對鞋又比你掃跌咗(以笑代替嬲)
(毛爺繼續暴喊發脾氣!!)
我攬住爆喊中的毛爺講:不如你執鞋比我,我放啊
(毛爺再掃跌多對鞋+繼續爆喊)
原來毛爺堅硬頸,仲未服、仲未認輸,唯有繼續同佢拉鋸
就係呢個時候Auntie Nancy忍唔住幫毛爺求情
工人:Anson maybe too tired, tomorrow try again la

 

孩子自理 - 安撫他
Photo from MamiDaily

若果我呢刻唔堅持就浪費左個好嘅教導機會,所以我一笑以對。不過真係喊得太耐,所以我決定攬住毛爺行出鞋櫃範圍,比佢回一回氣,幫佢抹下面、錫下佢、餵水佢飲(全程攬到實,拍拍背安撫著,等佢知道媽媽無嬲佢,不停比安全感佢),而毛爺都全程攬實我,開始回哂氣~係時候返戰場!毛爺見返番去+見到一地都係鞋又開始想喊
我:無事無事~唔使驚,媽媽陪你執返好啲鞋(繼續抱住)
毛爺望一望我,一隻手執鞋一隻手攬住我條頸,逐隻逐隻鞋拎起放返上鞋櫃度
我:叻仔呀!做得好呀!叻仔(錫錫錫)
最後毛爺自己執返好哂所有鞋

 

為左加深佢嘅印象
我:我地叫Auntie Nancy同Auntie Vina出黎睇,Anson已經自己放返好哂啲鞋啊!
我+工人:Good Job!Anson is a good boy!
毛爺知道人地讚佢,笑住自己拍手
我攬住毛爺一齊坐落地,再指住個鞋櫃
我:Anson真叻仔!自己放番好啲鞋(攬實佢錫左一大啖)
毛爺比咗一個好滿足嘅笑容,自己指一指啲鞋,然後拍手
〖故事講完〗

 

廣告
廣告

孩子自理 -耐性+意志力+極高嘅EQ
Photo from MamiDaily

 

用耐性+意志力+極高嘅EQ,一共用咗2小時20分鐘教識左毛爺放鞋一事,真心攰過番工
表面上係教識左佢點放鞋,實際上佢從中學到更多嘅
- 知道扭計、發脾氣同喊係唔會解決到問題
- 知道媽媽係唔會心軟,但會一直陪伴佢同支持佢
- 知道自己的事係要自己做,自己選擇用一分鐘定一個鐘
- 知道自己係有能力完成並得到成功感+有人欣賞同讚美

 

唔止增強佢嘅自理能力,仲提升左佢對媽媽嘅信賴、自信心同優越感。
點解我可以咁都唔發脾氣?
同自己講:明明一分鐘內可以完成嘅事,因為你唔識,所以要用更多時間去學習,我願意用更多嘅時間去真正地教識你,直至你成功為止!

而家毛爺每次都會自動自覺放好對鞋,每次放好仲好有滿足感、會拍手,一次的2小時20分鐘嘅教育,換嚟佢良好嘅自理能力+態度值呀~抵番哂
唔好放棄應有嘅立場,比耐性讓孩子相信自己嘅能力!

 

秘訣:立場堅定 但 態度要溫柔

 

==============================

Text & Photos:我愛攣毛哥

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

Share to Facebook