【懷孕記錄】28週突然出現宮縮？！

By 晞怡媽媽 on 19 Nov 2019

我叫晞怡媽媽，我係全職媽媽黎架，女女叫晞怡，今日剛剛9個月大，有4隻牙仔，想籍住親子日常分享一D有關湊b女既心路歷程，可以分享bb食咩零食、用咩產品、bb成長過程等等，剛剛10月25日仲一家三口去台北旅行，仲可以分享一下旅行用品同行程。

今次想分享一下懷孕期間既事係28週個時因為出現宮縮⋯

Photo from MamiDaily

當日上午7點左右肚仔痛醒咗，但又未夠鐘起身返工，去完洗手間之後諗住瞓多陣啦～點知肚仔開始有乸住乸住痛，我以為係食錯野攪肚痛就冇理到佢，繼續瞓係張床度，點知個種痛開始有規律，即刻望住個鐘計時：五分鐘痛一次；三分鐘痛一次；兩分鐘一次；最後一痛就成個肚硬哂，仲有少少急，緊係即時拍醒老公拎個走佬袋去醫院啦！

到醫院大概係07:45左右，老公去急症室打排版，我跟醫院姨姨上產前病房檢查，問完基本問題就上床檢查，護士話出現宮縮情況要用機mon住，08:30醫生黎檢查，開左2度，要用藥放鬆返子宮，令佢唔好宮縮。一開始用吊鹽水方式去打入去，一路mon住宮縮狀況，但係對我嚟講冇改善。之後就轉左食藥，第一次食藥反應好似唔係進展太理想，要食多一次藥，食完之後有少少反應，宮縮現象開咗減退，冇之前咁密。到傍晚17:00，老公可以入嚟睇我，醫生亦都黎左見我地，詳細講解返BB同我當時嘅狀況，BB同我都一切正常，但因為出現宮縮又開左2度未收得返，亦有機會會早產，為安全起見都要留院睇住，而且屯門醫院初生深切治療部暫時未有床位比我同bb，所以要安排轉去聯合醫院，要我同老公有心理準備BB可能會提早出世。當晚因為食左藥嘅關係，唔可以出車去聯合醫院，所以就安排咗第二日早上轉院。

Photo from MamiDaily

第二日早上07:00，醫院姨姨準備好衫褲比我換，正出發前，下身流啡、一大舊，嚇到我同老公叫醫生幫我檢查，我個心好似跌左落嚟咁，好驚好驚！之後醫生檢查都話安全、冇事，我先放鬆一啲。上到白車，由一位醫生，一位護士同我同車去聯合醫院，佢地每10分鐘就check一次BB心跳、check我血壓等。

上到去聯合醫院產房，一大班醫生、護士、醫院姨姨圍住我，左一句右一句問我資料、而家咩狀況、有冇宮縮等等，仲話準備好要生喇～嚇到我呢⋯即時問醫生係咪依家要生，我個刻真係好驚，老公又唔係身邊。好彩佢地檢查完話子宮開始放鬆返，度數開咗1度，明顯好轉緊，咁我就係聯合醫院產房過左一晚喇。
第三日，我終於可以食嘢同飲水。經醫生檢查之後宮縮同度數已經冇哂，可以返上大房唔駛留係產房，醫生仲話留院多一晚，冇事就可以出院休息。