【親子關係】佛系媽媽就代表縱容？聽話還是親子關係重要？

教育路爸媽分享

By 比卡超人妻 on 13 Nov 2019

移咗民加拿大十幾年嘅香港人，熱愛鑽研兒童心理和兒童健康，做咗兩年全職媽媽，傻下傻下咁樣又過咗兩年，希望在此分享自己呢兩年嘅育兒心得同趣事。

呀女過咗兩歲之後好明顯地行為態度都大個咗好多，呢排仲識得同我哋講條件。

Photo from MamiDaily

話說有一日朝早我哋準備出門口返playgroup，時間已經好趕，佢又未食早餐，我已經拿拿臨想同佢換衫除咗件睡衣，點知佢勁扭計，打死都唔肯除條睡衣褲，結果我響半嗌半氹下成功游說到佢換條牛仔褲。

我話你不妨試下將條睡衣褲當係棉被咁樣㩒住洋娃娃。返到嚟你咪可以即刻換返條褲囉。我哋而家要出門口喇，當時咁樣同佢講數其實都覺得自己好屎，但係諗住同兩歲人仔好聲好氣一定好過夾硬嚟。

另一個佛係例子就係我從來都冇阻止佢落雨跑去啲水氹嗰度。我覺得小朋友畀佢踩下水氹開心一下又如何，大不了返去換褲沖涼。

其實以前未生小朋友，自己嘅性格都好火爆，我覺得我要多謝自己個女改變咗我火爆嘅性格，令到我變得佛系。因為自己諗通咗，覺得啲人成日大聲喝罵，倒不如平心靜氣同埋學識有技巧地同個女講數去改變親子關係，珍惜呢段睇住佢成長嘅時光。

Photo from MamiDaily

為人父母其實唔係淨係一定要有權威，有時亦都可以隻眼開隻眼閉同佢哋一齊玩，或者畀佢哋空間同機會去做一啲喺我哋眼中覺得好頑皮嘅嘢。小朋友大得快，與其影響親子關係，倒不如花啲心機去了解呢個歲數小孩究竟想要啲乜嘢，佛系嘅態度唔單止令我同個女嘅關係變得非常親密，亦都令我對生活嘅態度有360度嘅轉變。其實想要小朋友聽話好簡單，但係有時要知道咁樣令到小朋友大個咗，乜嘢都唔敢同父母分享，甚至刻意隱暪。