【加固】寶寶食固體食物 媽媽最擔心便便和食物敏感

【加固】寶寶食固體食物 媽媽最擔心便便和食物敏感

爸媽分享 育嬰湊仔貼士 新手媽媽 幼兒健康
ByStefani on 04 Nov 2019

珍珠加固已經個半月啦,慢慢由每日新鮮整,變到用冰粒。雖然營養喺冰嘅過程可能會流失左啲,但真心慳返好多時間,媽媽每日真係真係好多野做⋯⋯整完仲要餵呢,有時連冰粒都無時間翻熱,趕到個女要食奶粉。。

返正題啦,珍珠暫時每星期試一樣新野,都係啲好穩陣、較少有敏感個案嘅食物。

已經食過:粥、蘋果、南瓜、奇異果、蕃茄、西蘭花、香蕉、提子、紅蘿蔔粟米水

珍珠已經有揀野黎食嘅反應,純白粥係喊住推開唔肯食;

奇異果因為太酸,份量太多係會喊住吞;

蘋果同提子會追住食,而提子佢更加係衰到識揀日本香印黎食⋯⋯

西蘭花間中會俾珍珠自己拎住咬,其實我見佢係食唔到落肚,當俾佢練習下自己拎住啲野黎食;

香蕉同提子都係我拎住俾佢食,麻咪都希望俾BB盡早知道食物唔係只得液體狀。

香蕉就原條俾佢「梅」,大粒香印提子打直連皮切開成4份;

要好小心,每「梅」幾啖就要望下件生果厚薄,因應返你對自己個B「一啖」嘅了解,接近佢會咬得斷嘅程度就要換過粒新生果,香蕉我就會切返平整俾佢繼續「梅」。

Touchwood一唔小心俾佢咬斷左會哽到/窒息,唔係好似成人吐返出黎咁簡單,所以要十二萬分小心!

廣告
廣告

有媽媽會買咬咬樂俾BB,但珍珠麻咪自己唔太想BB不停咬啲膠/網布袋混淆食野感覺,所以就無買俾BB用,但的確係會安全過媽媽徒手拎住俾BB食,媽媽可因應自己喜好選擇咬咬樂類產品。

加固後便便又係一個媽媽關心嘅問題

頭兩星期加固後,便便係偏乾同粒狀,明顯係吸收得唔夠水份~

之後開始俾水珍珠飲,但始終因為水冇味,珍珠啜兩啖就一定會收口,所以飲水只能當餐後浪口。

最後麻咪令珍珠有靚便便嘅方法係喺粥仔加入「適量」奇異果蓉,

因為太多佢會唔肯食,太少又冇用,所以份量都要媽媽自己拿捏。

而珍珠接受程度大概係10份粥1份奇異果,每2日食一次,便便暢通無難度!

有媽媽話金奇異果會甜啲,我暫時未試過,你地可以試下再share俾我知丫

==============================

Text & PhotosStefani

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

🤱🏻 追蹤我們的 Instagram mamidaily.hk 看更多育兒教育資訊
Share to Facebook