【全職媽媽】你究竟忙啲乜？五句觸動全職媽媽神經的說話！

爸媽分享教育心得

By 波豬媽 on 25 Oct 2019

波豬媽曾任電視台主播，亦從事過文字工作，如今係一位新手媽媽、緊張大師。人生座右銘係無論女人處於任何階段，都要活得精緻兼有層次。

作為全職媽媽，最觸動神經的說話，非以下五句莫屬。

1. 你究竟有乜咁忙？已經可以瞓到黃朝百晏。（不如你試咗呢份無糧出嘅『工作』先再問我☺️）

2. 你真係殘左好多喎。（你試吓連續N個月晚晚都唔夠瞓，如果你都仲可以容光煥發嘅話，我真係恭喜你呀。）

3. 我真係唔敢生啦，見到你哋就辛苦啦。（生唔生BB係你嘅選擇，我辛苦但我開心。）

4. 好心你放手俾人湊啦。（其實小朋友再大啲就會自然放開你隻手，點解你要咁急於放開佢隻手呢？但當然要考慮番自己嘅處境。）

5. 你唔好咁緊張啦。（其實每個人性格都唔同，不如我勸返你，你做媽咪唔好咁放鬆啦。）

全職媽媽究竟有乜咁忙？呢個問題相信好多FTM都答過一億次，但到今日依然有位未婚嘅朋友問我究竟忙啲乜？佢話：「我今朝7點起身返工啦，你瞓到黃朝百晏！」

全職媽媽日程

咁我依家就講下全職媽媽最普通嘅一日係點過，首先07:00 ，我其實都已經起咗身，仲餵緊朝頭早嘅第一餐奶，但咁樣唔代表我瞓到07:00先起身，因為我個女6個半月大，正值出牙仔嘅時期，好彩嘅佢一晚淨係醒一兩次，好快瞓得番，唔好彩嘅，佢試過一個鐘醒一次，甚至醒咗之後氹足兩個鐘都唔肯瞓番，由於我有接freelance做嘅關係，試過前一晚係加埋都瞓唔夠3個鐘，之後第日又要出去做嘢，我係非常之精神恍惚，因為我精神同身體都好疲勞，但冇辦法，不過身體好聰明嘅，當你以月計咁樣累積唔夠瞓，佢會慢慢習慣咗，唔會死嘅，只係好攰啫。

咁佢飲完第一餐奶之後又點呀？我又要再準備煲定個粥底俾佢，預備佢晏晝同夜晚嗰餐加固，我已經係用最簡單嘅方法，唔洗浸米，直接喺電飯煲度㩒嬰兒粥個制，就等佢慢慢煲。BB仔真係唔係公仔，唔係話飲完奶幫佢換完片，佢就會安定再瞓覺或者自己瞓喺度玩，佢可以自己瞓喺度玩一陣嘅，但之後都係會要你陪佢玩，咁朝頭早陪佢玩完一大輪之後，佢都會再恰一恰半個鐘，咁呢個時候我都會再瞓一陣，我個女雖然唔係最易湊，但應該未去到最絕望嗰啲難湊。

好啦，話咁快又到咗10點幾，又要起身換片片，同埋準備整埋個粥仔俾佢食，當我今日係整蕃薯瘦肉粥，我就要煲啲蕃薯同瘦肉，然後用BB食物處理器將佢攪成蓉，再將佢放落個粥底度，食完呢餐之後佢就唔會瞓覺，一直玩玩玩，咁我就要趁佢玩緊嘅時間，加緊時間煮野俾自己食，我已經係好幸運嗰個，因為我奶奶差唔多一個星期有四至五日會過嚟煮晚餐俾我食，仲會幫我洗埋BB衫，老公亦會分擔家務，加上父母亦經常下晝過嚟陪BB玩，所以我點解都仲有時間經常出Po。

唔好以為BB瞓咗媽咪有時間

因為太長氣嘅關係，嗰啲無限loop換片陪玩餵食嘅過程都無謂重複再講，同埋唔好以為BB下晝瞓咗覺，媽咪就會有時間，以我個女為例，佢下晝一定係要抱住瞓，仲要係每次瞓15至30分鐘左右，呢個習慣真係超級唔好，但真係戒唔甩，唯有向好方面諗，佢可以俾你抱得幾耐？仲有，佢依家係認人階段，一入夜就搵我，試過嫲嫲抱一抱佢俾我去廁所大個便，呢10分鐘佢好似被虐待咁不停嗌，真係做過媽咪先會明白咩叫做屙屎都唔得閒！講咗咁耐，唔係想你明白做全職媽媽有幾忙，而係話無論全職媽媽又好，在職媽媽又好，甚至乎係未婚未有小朋友都好，其實都唔使去質疑人哋嘅人生過得苦定樂，都係嗰句，條路自己揀，— — 唔好喊，同埋有小朋友嘅快樂，係真係超乎你想像。