【照顧初生】突然回帶｜讓媽媽透不過氣來的初生寶寶

終於搬屋既野都執得7788，有時候寫下blog同大家分享。

尋晚瞓唔著，望住hey魚諗番佢初出世，突然好想同大家分享下，我頭三個月湊初生既事⋯⋯

湊初生真係超級攞命，大家都經歷過日夜餵奶、換片、同掃風既階段⋯

頭三個月我真係以為自己就快死，超級神經質。

成日都驚會BB突然猝死，所以就算瞓左都會彈起身睇佢有冇抖氣

加上餵人奶，初生bb又食得慢，一食就食左我成個鐘，之後掃風

好彩個次幾分鐘掃到，聽到落格聲真係好有成功感～

唔好彩掃極都無，都唔敢咁快放落床⋯⋯我會抱佢15分鐘先放落床

因為新聞都聽得多，BB嘔奶而導致窒息死亡

到放低佢，又要爭取時間泵奶追奶同食野

到真正想抖，佢又要換片食奶，長期咁真係會頂唔順

我好記得有段時間，我每晚半夜都會突然好似窒息咁，完全抖唔到氣，個感覺好辛苦⋯⋯

我係咁拍hey魚爸爸，佢都幫唔到我，只可以靠我狂抖氣先慢慢正常番

個個感覺真係好恐怖，都差不多成個月都係咁

後尾我番健康院有同醫生講，佢話因為壓力大、太攰，個人突然由深層睡眠一下跳到清醒，身體轉換唔到就會有窒息情況

同埋太攰半夜大部份時間張開口呼吸，成個口同喉嚨好乾，一醒個下就會好辛苦⋯⋯

之後我就開始盡量抽時間瞓一陣，唔好比自己攰到完全頂唔順先瞓

因為個窒息既感覺好接近死亡咁，諗番起都好驚⋯

依家hey魚20m啦，佢係活潑寶寶，日日都放晒我電～

但晚上我休息既時間都叫固定，就再無呢d情況

初生幾個月真係太勞累，如果可以記得放手同搵身邊既人幫手，日頭搵人頂下更，夜晚就算要湊BB都無咁辛苦⋯

我經歷左n個24小時一個人湊B既日子，其實一個人真係會好攰

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text：Hey!魚媽媽

Photos：Hey!魚媽媽 , MamiDaily

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！