【戒片】巨大戒片工程 - 第一期

今年暑假我地進行咗一項巨大工程 --- 戒片！！！

由7月頭去完旅行返嚟，我地就實行喺屋企唔著尿片嘅生活，有點意外地唔駛一個月米豬已經可以自己表達去vivi，冇再瀨濕～不過我仲未敢挑戰去街唔著片呀～夜片都未戒（但我曾經同戒夜片擦身而過⋯）今日就同大家講吓我地點戒片啦～

媽媽嘅準備工夫

米豬 1隻

短褲仔 20條

底褲仔（買吓買吓成30條XDD）

戒片褲 5條

洗浸瀨尿褲專用盤仔 1個

腳踏 1個

兒童尿兜 1個（多謝舅父仔送比米豬）

兒童廁所板 1個

唔再用嘅沙灘大毛巾 1條（剪開8幅）

膠highchair連防水墊 1張

防水床墊 3張（大床、米豬張床、梳化各1）

噴壺 1個

心理準備

開始戒片前2個月，同米豬無限loop咗啲關於戒片嘅繪本，包括《米米上廁所》 同埋《小男生上廁所》

比佢知道大個咗可以唔著片片㗎喇～有時沖完涼，仲會同佢攤多陣先著片，等佢feel吓唔著片有幾爽皮～（各位媽媽都知道夏天M到仲要挾住條M巾有幾辛苦，BB們仲要兜住條厚厚片，幾透氣都假啦）

放暑假前學校有2節toilet training時間，成班小朋友一齊去廁所，識去vivi嘅就vivi，唔識嘅就洗手，期間老師同姨姨們都會帶未識自己去廁所嘅小朋友去試吓vivi，未必一吓就屙得出，但係去同廁所／尿兜認識吓都係一件好事～

開始戒片

暑假一開始我地就去咗旅行，旅行返嚟之後我就同米豬講：「我地大個仔，唔著patpat喇～」當然唔小得超精美底褲仔：包包超人同車車當然唔小得啦～

頭2日試吓著戒片褲先～～同時都包晒張梳化

以免佢喺梳化瀨尿時我崩潰（不過好多時都比呢隻馬騮當咗新遊樂場）

佢話佢匿埋咗叫我捉佢

初時就keep住個零鐘問佢去唔去廁所，之後都係唔肯屙，但係不停咁瀨⋯⋯⋯⋯⋯⋯瀨咗就自己洗啦～！

然後發現呢條友仔好enjoy洗底底⋯⋯-_-|| 轉玩法：瀨咗之後原隻捉入浴缸，教佢自己除咗啲濕咗嘅褲出嚟，期間就抹返佢瀨濕咗嘅地下，我會乾布索晒之後擰水抹2次， 再用噴壺噴滴露消毒地下（順便辟味），當然濕咗褲嘅佢會癲咗啦～T^T「媽媽唔要濕濕」、「patpat唔舒服 」T^T

轉玩法

瀨同抹嘅情況持續咗大約1星期，米豬對於廁所好似有啲恐懼，死都唔企上去屙，呢個時候舅父仔送嘅尿兜就出場喇～！！

基於有目標要玩嘅關係，下一轉佢就接受咗個尿兜喇～～而且米豬仲為咗有得fea到佢轉，想去vivi時會主動同我講tim～～當然唔小得獎勵啦～～每日我地都會揀定一款鐘意嘅零食，只要成功去vivi冇瀨到就可以食零食喇～好彩米豬揀親都係細細粒碎濕濕嗰啲，每次比5粒佢已經開心到跳起（媽媽平時喺屋企對零食派放好嚴，但出街就放題XD），仲facetime同婆婆講自己叻叻有叫去屙vivi所以媽媽獎佢食零食，3日後喺屋企已經完全唔駛著片喇～yeah～！！！

不過出街都有啲淆底佢瀨，所以都有著片。但出門口前都會問吓佢：「你要唔要vivi呀？」 一般都會vi小小，vi完先著片落樓。如果只係3-4個鐘，返屋企條片都係乾㗎！～～

脫離尿兜

一路喺尿兜屙咗2-3星期度，偶然有1-2次玩得太癲唔記得叫去vivi而失手。忽然間有一日，玩玩吓跑嚟同我講「媽媽屙vivi」咁如常咁帶佢去廁所啦～向住尿兜準備除褲仔之際⋯⋯
米：「唔要屙轉轉」

媽：「咁喺邊屙呀？」
米（指住廁所）：「屙呢度」

得～！即刻拎返喺廁所入面默默等候嘅腳踏出嚟～

就呢刻開始就同小青蛙尿兜講再見喇～～～

校內戒片

8月中開學2星期後，有一日放學班主任問我：「米豬戒咗片未」 唔知喺屋企清醒時間唔需要再著片算唔算戒咗呢？老師話算係㗎喇～所以就suggest我下星期開始喺學校唔再著片片（老師你地唔怕抹地，我當然樂意配合啦XD）

第一日著戒片褲返學（我都驚著普通底底一瀨會抹到姨姨們傻，所以由戒片褲做起）， 老師話同米豬去咗3次廁所，但每次佢都好抗拒一唔比老師同佢除低條褲仔屙vi一結果忍到放學就瀨咗了⋯⋯如是者成2個星期，繼續抗拒老師同佢去廁所，我朝早都特登同佢去一次先返班房，但老師話除唔到褲仔咁瀨都冇辦法，唯有等佢自己識除先再喺學校戒片啦

殘念des ne⋯⋯

某次忍到放學先瀨濕，喺換片房賴死唔走 -_-

米豬戒片算唔算好成功？對媽媽嚟講喺屋企同婆婆屋企冇瀨，就算玩到癲咗，急急會叫我同佢去屙vi，有時著咗片都照話急vi要我同佢屙，我已經覺得成功咗一半㗎喇～～不過有一個星期都好沮喪㗎，就係成功戒片後3星期（其實連夜片都乾咗3星期，真心打算戒埋夜片）但係米豬忽然間發燒，燒足3日38.8度

食藥先退燒，見佢唔舒服就同佢著返片，等佢唔駛驚住瀨濕，可以好好休息，結果一星期好返晒之後戒片又由零開始 Orz

不過有咗之前嘅經驗，今次一星期就回復正常喇～～但係夜片就變返朝朝飽滿⋯⋯唔緊要啦～我已經覺得你好叻仔㗎喇d^3^b 一步一步慢慢嚟啦～

好慘豬燒到趴喺度唔郁⋯⋯

下一步向唔駛著片去街進發～！！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：米豬媽媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！