【膽量訓練】如何將怕羞小豬訓練成為勇敢小孩？（第1篇）

揚家姐出世開始已經係怕羞豬，怕羞程度相信係達到十級。

一歲前有人嚟我哋屋企，佢會喊足三個鐘。相信家有怕羞豬嘅父母都會覺得好頭痛，有時又覺得好激氣，好擔心佢哋唔能夠將自己嘅能力喺人哋面前發揮出嚟～

過去呢幾年我都做咗、試過好多唔同嘅嘢，今日揚家姐已經可以好大膽咁係人面前講嘢同係台上面表演。我哋暫時考小尚算順利，暫時有一間私小Offer，同一間收6千幾個application 嘅直資嘅second in（未知結果）～

就等我由細個開始講起～

由於揚家姐非常怕羞，1歳前基本上都好少同到陌生大人玩（大人好緊要，因為面試時一定係大人），我就非常惶恐，因為過多幾個月已經要面試n班。

於是乎我每晚放工後都會同佢落街，一齊搵5個陌生人開口打招呼。目標要搵到5個才收工，好似sales跑數咁。呢個唔止對揚家姐，對我嚟講都係好大挑戰，無啦啦係條街度搵人打招呼，真係有啲尷尬～但為咗考n班唔會食蛋，唯有頂硬上⋯⋯

Photo from MamiDaily

大概過咗幾過月，揚家姐對住陌生人已有好大改善，至少唔會喊，有時心情好甚至都主動講hello><

Tips：何來搵咁多陌生人？

最容易就係去超級市場和屋苑門口更臺！！啲超市姨姨叔叔／看更見你打招呼，基本上實會笑笑口say hi（半被迫），同埋好多時同你帶住BB都會主動同你講嘢。其實搵5個人打招呼都唔係好難嘅，但當然唔好日日搵同一個人，如果唔係就唔好問點解佢遠處見到你同阿B會閃咗去～

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text：揚揚媽媽

Photos：揚揚媽媽 , MamiDaily

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！