【Marvin半歲了我當媽半年了！】

By Doris on 20 Sep 2019

Hello~大家好,我叫Doris!我係一位90後既準媽媽,仲有15日我就會成為媽媽啦!人生可以展開新既一頁,我真係好開心亦都好興奮。我今年25歲，話年輕又唔係，話我老都唔係，但我知道係成為媽媽呢一條路黎講係比較早。我細細個就已經係一個好想做媽媽既女仔，我好記得我細個成日都會扭計要媽咪買d bb公仔玩具比我玩,等我可以扮媽咪，中一二既時候我同我同學講我想25歲前可以做人媽咪，以今時今日既我可以實現我中學既願望，我真係好開心~

我上一個blog距離依家我諗都半年有多啦～因為做左人地呀媽後真係冇咩時間可以做到自己野，但之後我會勤力d update大家！呢一次好想分享一下呢半年入面自己既改變，做左人地呀媽之後個個改變大到自己都驚呀！

1.自然醒

人人都話做左人地呀媽之後自然醒係一個恩賜，我想同各位準媽媽講係真架！！！！自從呢個小朋友係我個肚出左黎之後，自然醒呢一樣野就離我而去。坐月既時候唔好話睡到自然醒呀，半夜你想瞓一教好既都好難好難，何況自然醒呢～Marvin好錫媽咪，未到個半月既時候已經唔洗飲夜奶啦，所以媽咪就叫做有覺好瞓，但自然醒就一排都未肯返黎我身邊啦！（有d野我想補充既係：我每一朝起身都見到我個位豬隊友瞓到好似隻豬咁，個一刻我好羨慕佢～）

2.自己既時間

自從Marvin唔洗食夜奶之後我既生活開始變得輕鬆左d，因為每一晚要起身餵夜奶係一件好好好辛苦既事。因為唔好以為淨係餵一餵奶好快就可以瞓返，因為事實往往唔係你諗得咁簡單，你餵完奶、又要掃風（Marvin係一個好難掃風既小朋友，我試過不停咁掃掃左9個字先掃到出黎），之後又要換片、再之後又要泵奶。呢一連串既活動過後你就可以瞓一個鐘，因為你整完呢d野之後已經3個鐘，瞓一個鐘之後你又要餵第二次奶。日頭既時間你淨係想瞓教，仲講咩自己既時間呢～所以Marvin冇飲夜奶之後，總算有自己少少既自由時間。

生完之後記性真係差左好多好多，以前我記性都真係幾好，生完之後我真係成日唔記得「自己」野。我成日同Marvin出街，佢既全部野我都記得一清二楚，從來都冇帶漏佢既野。反而我自己同老公既野就成日唔記得，之後我發現左一樣點解生完會記性差左既原因。因為自從生完之後，無論你個腦或者係你既專注力都會去哂bb到，就算瞓著左我聽到少少聲，我都會望下係咪Marvin醒左，出街街自己帶漏野唔緊要，帶漏左BB d野真係好緊要。所以我地生完唔係記性差左，係我地要兼顧既野多左好多好多、個腦入面要記好多好多野，專注力都用多左好多。

4.身型同外貌既改變

自從有左呢個小寶貝之後我既身型真係改變左唔少！真係由一個100磅多少少既女仔變左120-130磅既小肥妹～生之前嗰個都話你咁後生好快就會瘦架啦，呢一句係好好安慰人既說話，但現實往往係殘酷既。我本身都想順產既，但因為開唔到既關係，所以變左開刀。生完諗住做下運動，點知個個都話開刀唔可以咁快做運動，我就一直係到等，等到依家半年先可以跑下步。生完我係有去紮肚既，但如果你諗住紮左10次佢會瘦、或者可以好似廣告咁，係唔得既～（可能只係得我唔得，其他媽媽可能成功）到依家做返運動啦，個人真係可以瘦返。但係個段岩岩生完又腫又肥既時間入面，我成日都同我老公講，我依家咩衫都著唔到好醜怪！我老公真係一如既往不停咁安慰我，好多次都會同我講：其實瘦左好多架啦，慢慢黎比心機做下運動，好快就好瘦。接受同改變係一件好難既事，何況嗰個女人都注重自己既外表，但我相信做左媽媽之後，係冇一樣野會難到大家既！

5.夫妻之間

夫妻之間既改變係我冇預計過既一環，因為生左Marvin之後我既中心點就由我老公轉左去個仔到。我坐月既時候係我最感到困惑既時間，當時我問我既陪月，我話我對我老公有一種好陌生又好熟識既感覺，係我之前從未有過既感覺。陪月姨姨就對我講：因為我見到你比哂自己既愛同埋專注係BB到，可能你老公都有呢種感覺，不過佢冇同你講，你可以問下佢有冇呢個感覺。陪月姨姨一講完我好似比佢點通左咁，咁我當晚等我老公放工返黎我就問佢啦，原來佢一直都覺得唔開心，因為自從個仔出左世我好多時所有野都係比左個仔，完全忽略左我老公。後知後覺，我即刻分返d時間比老公，比佢知道我唔係淨係顧住個仔。各位準媽媽同媽媽記得唔好忘記身邊既老公，其實佢地默默為你同呢一個家付出好多，將心入面既愛大聲講比老公知，等佢開心一下。爸爸其實就係呢個家既第二個小朋友，當佢小朋友咁錫，佢一定會好開心！