【新手媽媽產檢注意事項】

By Stefani on 17 Sep 2019

80後新手媽媽，未有bb之前中意周圍食野，烹飪，旅行，運動，化妝扮靚。有bb之後全職研究如何成為稱職又不脫節的潮媽，繼續玩食買，努力分享試後感。

奇怪啦！點解珍珠4個月大先出產檢post？並不是珍珠麻咪又有喜，只係回想返當日第一次喺公立醫院做產檢其實好徬徨，公立醫院要處理嘅cases太多，有時未必可以講得好清楚/ 會重複講，加上珍珠麻咪有點佛系⋯⋯好多檢查都係好遲好趕先book，所以麻咪一於寫返少少事項，希望俾新手媽媽盡早有個心理準備～

首先第一問，一定係問「是否必須到公立醫院檢查？」

其實唔係必須，珍珠麻咪選擇喺私家醫院順產，但考慮到如果喺街突然有咩狀況要入院，救護車只可以送孕婦到就近公立醫院，所以不論媽媽選用公立定私立醫院生產，都係喺公立醫院留個record穩陣。

「發現懷孕後，第一步係做啲咩？」

當然係去就近診所驗清楚真偽先，珍珠麻咪就去左自己用開嘅婦產科醫生度做第一次檢查，先拎懷孕證明，後去公立醫院婦產科掛號。

正常情況大約係懷孕6-8w，因為珍珠麻咪比較遲先發現懷孕，所以好多checking schedule都好似趕deadline咁。

呢張懷孕證明之後好多地方都要用到，影低softcopy確保唔好唔見。

Photo from MamiDaily

初次產檢小注意：

驗孕通常需要用尿液＋試紙去檢驗，媽媽請留意用中段的尿液，咁樣係最準確。

產檢盡量穿著舒適，方便著除嘅衣服。因為要check血壓，所以預好充足時間到診所，無謂趕住跑去，辛苦孕婦同時亦不易量度到正常血壓。

記住懷孕前最後一次月經日期，呢個日子喺頭幾次產檢／照結構，不同嘅醫生會不斷問你去確保所有日子無誤。

*盡量記住孕婦所有個人及家族病歷

公立醫院掛號須知：

醫管局有個app叫「預約通」，先做網上預約特定日期時間去掛號(大約係懷孕8-10w)，文件上嘅野要帶齊，app會提你要帶啲咩。

身份證明文件一定要帶，老公嘅身份證都需要帶定副本，仲有住址證明，要confirm你去返正確居住地區所屬醫院。

除左文件以外，要再三提醒媽媽帶備3樣野：

暖水，乾糧，外套！

因為經驗黎睇，不論講幾多次，都會有媽媽唔記得帶，等待見醫生／檢查嘅過程，一係餓到暈，一係凍到震，所以每次產檢都記得要帶！

踏入12w，(14w前)公立醫院會免費提供「唐氏綜合症檢查」(度頸皮)會由醫生用超聲波去睇。

另外媽媽呢段時間可自選到私家診所抽血去做「無創性胎兒DNA產前篩檢」(例如T21及Nifty)

珍珠麻咪又係deadline 22w前先去book⋯⋯嚇到姑娘即刻搵翌日嘅位俾麻咪攝，真係辛苦哂

Photo from MamiDaily

去到20w，就可以到私家診所照結構，醫生會用超聲波去詳細睇下BB器官四肢是否齊整。照結構要盡早book定醫生，大致係一發現懷孕就要揀定醫生準備book，一啲熱門醫生係極速無位，珍珠麻咪就係好遲好遲(deadline 24w尾)先揀醫生book，最後打左好多電話先book到位出名熟手而自己又有信心嘅醫生。