解渴消暑 蘋果竹蔗茶

基本上我都真係成日會煲竹蔗茅根水俾我家兩位老細飲，因為係佢地兩父子嘅至愛頭幾位嚟。前幾日睇到介紹，原來竹蔗唔一定用茅根嚟煲，改蘋果加青檸都一樣可以，仲可以解渴消暑。

咁我又正準備要買材料煲涼茶，咁就煲依個蘋果竹蔗茶啦。

竹蔗有清熱之效，能解肺熱和腸胃熱；蘋果具有生津止渴、潤肺除煩、健脾益胃、養心益氣、潤腸、止瀉、解暑、醒酒等功效；青檸有潤喉殺毒功效，而且仲有助消暑解渴。(網上資料)

竹蔗2札、蘋果3個、青檸2個、冰糖適量~

竹蔗洗淨破開兩邊~

蘋果刮去果蠟後去芯切塊~

將青檸揸汁~

煲內放大約2L水，然後放入竹蔗和蘋果~

待滾起後，用大火加蓋煲10分鐘~

然後就可以因應個人口味加入冰糖~

轉用慢火加蓋煲1小時~

待放涼後就可以加入青檸汁~

可以飲得啦~

佢嘅味道又幾得意，有蘋果竹蔗香之餘，又有點點酸酸甜甜味(可能因為加左青檸汁)，有少少泰國風味...哈哈哈。

唔係自己讚自己，都真係幾好飲。不過我覺得雪凍左之後個味道仲出，加上凍凍地又可以消暑，絕對推介大家炎熱天時可以煲依個正涼茶呀！

溫馨提示：
由於個別人仕體質不同，所以大家記得煲之前了解下自己，如有疑問，請先向註冊中醫查詢！

Text & Photos：小小豬Kinsey

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！