做家務由細開始!4個好處+分階段建議

做家務由細開始!4個好處+分階段建議

mami熱話
ByCircle on 23 Aug 2019 Digital Editor

好多父母都當小朋友係金笸籮,咩都幫佢哋準備、安排好晒,連好小嘅事都唔畀佢做,驚佢受傷整親。其實家長唔使咁緊張,尤其係喺屋企分配一啲簡單小任務畀佢哋,分分鐘佢哋仲開心啊!即刻睇吓做家務4個好處同注意事項,最後仲有小建議,可以參考吓小朋友幾多歲做咩家務好~

MamiDaily
Photo from MamiDaily

好處

1. 助智力發展
小朋友嘅成長,其實好多時都由做家務開始!大人一般都覺得做家務好辛苦,其實小朋友當玩!父母可分配一啲家務畀佢哋,等佢哋可以動動手、動動腦,慢慢自由地摸索一吓呢個世界~

2. 培養責任心
由細灌輸「自己的事自己做」呢個概念畀佢哋!喺一個家庭入面,人人都有自己嘅崗位,小朋友作為其中一個成員,都需要為大家付出,從而慢慢培養佢哋嘅責任心,做個有責任嘅人!

MamiDaily
Photo from MamiDaily

3. 成就感
做家務時,有可能會面對一啲平時未遇過嘅困難,家長應該放手畀佢哋試吓,慢慢喺過程中搵出解決問題嘅方法!當佢哋成功完成任務嘅時候,內心就會產生成就感;而成就感往往亦係培養自信心嘅重要原素!

4. 保持親密關係
家長可以透過做家務環節,同小朋友一齊做、一齊玩,過程中大家有更多交流,絕對能夠令家庭關係更親密!

MamiDaily
Photo from MamiDaily

注意事項

1. 切忌「完美主義」
就算小朋友做得唔太好,家長都唔使因而責罵佢哋,反而應該教導佢哋點先可以做得好啲!當做得好嘅時候,一定要稱讚吓佢哋!

廣告
廣告

2. 適當時改變項目
唔好次次都係做同一個項目,唔係好容易厭倦,唔再聽媽媽嘅指示!另外亦唔可以畀太多任務佢,要考慮小朋友嘅身體情況同心情等因素。

MamiDaily
Photo from MamiDaily

3. 愈早開始愈好
小朋友其實好鍾意扮大人,又好鍾意做小幫手!由細開始叫佢哋幫大人做一啲簡單指令,從中亦可以慢慢教佢其他辨認顏色、數字、形狀等。

0-4歲小朋友做咩家務好?

0-1歲:簡單指示,例如換完片片叫佢放入垃圾筒、用完嘅紗巾放好

2歲:困難較高嘅指示,食飯前幫手放餐墊、玩完玩具執返好等

3歲:食飯後收拾餐具、沖涼換洗嘅衣服放入洗衣機/洗衣籃、收衫分類、抹地等

4歲:幫自己執書包、穿鞋子、準備校服、幫手晾自己嘅小衣服、清潔玩具等

MamiDaily
Photo from MamiDaily

註:唔同小朋友嘅情況都唔同,家長應按照佢哋嘅能力分配。

Text:Mami Editorial

Share to Facebook