增加安全感！有效消除孩子恐懼的5個妙計

小朋友唔止人仔細細，心靈有時仲好脆弱，好小事都會令佢哋留下陰影。小朋友驚嘅事有好多，好似因為水入眼而唔敢沖涼、因為太黑而唔敢自己去洗手間等等。家長喺呢方面可以點樣幫佢哋克服恐懼呢？除咗搵出原因對症下藥，以下呢5個方法都可以試一試！

Photo from MamiDaily

1. 預防恐懼發生
父母應該先了解平時小朋友對咩嘢有好大反應或者一見到就想逃避，例如唔肯食飯或飲湯嘅話，會唔會因為佢哋之前試過畀熱嘅食物整親呢？爸爸媽媽喺佢哋放入口之前，可以預先試食並同佢哋講：「已經唔熱㗎啦！」咁樣就可以喺日常生活中慢慢預防恐懼發生～

2. 喜歡+害怕嘅事物放埋一齊
將小朋友害怕嘅嘢重新定義！例如小朋友好鍾意去公園玩嘅，不過每次見到狗狗都覺得好驚，家長就可以先同佢講：不如我哋今日去公園玩啊～ 之後帶埋狗狗一齊去買糖糖啦！咁佢哋每次諗起狗狗就只會記得開心嘅事，好大機會可以逆轉狗狗喺佢心目中嘅形象，慢慢就唔再驚啦～

Photo from MamiDaily

3. 賜予勇氣
呢個方法就好似角色扮演或者進行一個儀式咁，由大人將身上嘅勇氣賜予界小朋友！除咗摸摸頭之外，家長可以「製造」一啲魔法噴霧、魔法衣服等，再同佢哋講：「依家有神奇嘅力量保護你啦」，等小朋友面對恐懼時，認為有魔法、有父母支持，可以用呢啲「寶物」衝出去面對！

4. 分享自己經驗
喺小朋友遇到害怕嘅事情時，譬如行雷閃電時，父母可以即刻抱實小朋友安撫佢哋，等佢哋冷靜落嚟時，搵機會同佢哋分享自己類似嘅經驗，承認自己都有害怕嘅事情。一方面等小朋友感受到被爸爸媽媽了解，另一方面可以慢慢幫佢建立自信心，等佢知道原來大人都驚㗎～ 大個仔就會唔驚驚啦！

Photo from MamiDaily

5. 講故事、玩遊戲
小朋友閒時冇嘢做最鍾意就係睇故事書同玩遊戲，爸爸媽媽可以喺故事同遊戲內容加插一嘅小朋友驚嘅人或事，陪佢哋認識恐懼對象，從中了解並慢慢接納害怕嘅事物！

Text：Mami Editorial