少女變人妻 再變「一家之主」嘅6大證據

做咗人妻、媽媽後，經常都好懷念做人哋個女嘅時光，所以次次返娘家都唔捨得走！呢3個身份唔止代表住年紀嘅進化，連生理同心理都好大改變。即刻睇吓以下呢6項係唔係做咗人哋老婆同媽媽嘅心聲啦！

Photo from MamiDaily

1. 皮膚變差
以前仲做緊人哋個女嘅時候，雖然成日捱夜出夜街，係就係黑眼圈大咗啲，不過飲返多啲水就得。依家做咗人哋老婆同媽媽，成日冇得瞓覺，又好多嘢擔心，皮膚真係冇以前回復得咁快，好似用幾多護膚品都救唔返。唉，多咗幾多條皺紋都數唔清啦！

2. 陳新代謝變慢
以前受傷傷口埋得快，連減肥都好快見效。依家唔止冇時間減肥，肚腩凸凸，仲好容易病！身體冇以前咁好應該係陳新代謝變慢，唉，真係要抽多啲時間做運動啦！

Photo from MamiDaily

3. 激人變成被激
細個成日激親爸爸媽媽，依家做咗老婆同阿媽，經常畀老公同BB激親！依家先知父母以前對自己有幾包容～ 如果老公同小朋友激少自己一日，心情好啲，皮膚應該都會變好啲～

4. 擔心又囉嗦
細個嫌阿媽囉嗦好長氣，依家做人老婆同媽媽先明白原來見少佢哋一眼都驚佢哋有事。自己不知不覺間都變得杞人憂天～ 咩都諗好多！

Photo from MamiDaily

5. 記性變差
唔知係咪生完BB有影響，做咗媽媽之後記憶力真係差咗好多。以前咩都記得住，依家唔寫低都唔記得聽日有咩要做！

6. 話題圍繞家庭、小朋友
身邊嘅朋友同自己一齊成長，各自組織自己家庭！出到嚟食飯唔止憶舊時，話題仲圍繞家庭、小朋友，傾吓湊仔經，又講邊到有好嘢玩好嘢食，啱晒做親子好去處！

Photo from MamiDaily

Text：Mami Editorial