【小Baby申請回鄉證 2019年8月最update消息！】

事緣上次我同吉豬爸去北京，我哋根本冇諗住要帶埋小吉豬去，但小吉豬一聽到吉豬爸同吉豬媽要去旅行，佢即刻話要同爸爸媽媽一齊去。

當然最後佢都唔得逞啦，因為佢根本就冇回鄉證！基於呢個情況，令我萌生要幫小吉豬申請回鄉證嘅念頭，就於網上登記預約事宜（網址係http://ww1.ctshk.com/zh/apply-chinapermit/），揀首次申請再輸入簡單資料如身分證號碼同出生日期，揀埋你想去邊區嘅中旅社，再揀埋日期時間就可以，可預約日期通常係兩至三個禮拜後，預約時間20分鐘為一節。

預約登記完成後我就請咗嗰日假（半日only），準備親身帶小吉豬去辦理回鄉證。為咗減低臨時臨急整呢樣嗰樣嘅風險，我預先喺網上下載同列印咗張申請表，至於授權書，因為我（即監護人）親自帶小吉豬去，所以唔需要填。

好重要好重要好重要，張申請表一定要用黑色原子筆填，藍色原子筆都唔可以！仲有，因為係兒童申請回鄉證嘅關係，只能夠剔五年，唔可以剔10年。

之後我喺著名討論區睇到話要帶呢樣帶嗰樣，我就照足準備咗一堆文件，但原來唔係樣樣都要。
以下係所需文件嘅清單：
第一：申請人特區護照及其副本一份
第二：申請人身分證及其副本一份
第三：申請人出世紙及其副本一份
第四：監護人身分證及其副本一份
第五：相片一張加其softcopy（稍後會再提及此點）
第六：填好左嗰份申請表（如果選擇到場先影快相，相片欄就丟空）

之前睇到有啲媽咪話要帶埋學生手冊，但因為小吉豬仲未返學，所以我就冇準備呢樣嘢，職員亦都冇問。
我預約嘅地點係旺角洗衣街中旅社，準時到達後上兩層樓梯去到辦理證件嘅樓層，見到人山人海真係嚇死人。之後行去「查詢及取籌」嘅人龍排隊，雖然人龍有點兒長，但職員姐姐辦事能力實在太高，好快ko咗條龍。輪到我哋時，職員姐姐用佢鷹一般嘅眼睛望一望啲文件，同時間再用rapper咁快嘅說話速度問你有冇帶呢樣嗰樣，之後隻手閃電般已經撳咗張籌俾我地，然後叫我哋去影相再坐低等等。

去到影相位置有好多姨姨喺側邊幫忙，佢幫小吉豬墊高張凳，再教我坐喺張凳仔扶住佢條腰，再托一托小吉豬塊面叫佢望住自己，倒數最後一刻姨姨即刻縮手，一次就搞掂啦！Amazing~ （因小吉豬是很麻煩的，所以咁順利令我有點驚訝⋯）
因回鄉證所需相片有指定規格仲要有softcopy以直接上傳相關單位，所以勸喻大家去到現場先影名仕快相，否則就要準備好一張相片再加一隻光碟。雖然影完有四張而佢只需要一張，但我仍然覺得呢$50抵俾，起碼張照片一定合格，同埋快相附帶條碼可以解決咗整光碟嘅問題。
好重要好重要好重要，因為回鄉証要求嘅照片係白色底色，所以注意事項已經講到明唔可以著白色衫影相，各位請記住到時著白色以外其他顏色嘅衫啦～
雖然已預約時間，但拎住張籌都要等30分鐘先輪到我哋去櫃位。職員問需要唔要快證，我話唔需要，佢就話15日後就有得攞（感覺唔算等好耐啫），最後盛惠$260，搞掂，走得！