【在職媽媽同傭人姐姐雙劍合壁 家務+2個B都搞得掂!】

【在職媽媽同傭人姐姐雙劍合壁 家務+2個B都搞得掂!】

爸媽分享 mami熱話
By唯媽on12 Aug 2019

我一向都覺得叫外人湊bb比自己湊更大壓力,因為外人湊有好多顧慮,擔心佢湊唔掂,又驚佢太辛苦要走...好感恩喺我哋同姐姐嘅合作下,佢暫時都搞得掂兩個baby bosses。

其實最辛苦應該係唯b放暑假呢段時間,因為姐姐要由我出門口開始就照顧兩個同做家務。湊一個初生加一個Terrible 3(仲要係非常terrible同埋要好多attention)真係唔容易!

每個家庭處境都不同,希望以下嘅分享幫到大家。

唯午餐:
每朝起身返工前準備好唯b嘅午餐,洗同切好,放入雪櫃。到11點幾,姐姐一放入蒸爐就得。如果真係唔夠時間做,都唔一定要餐餐食飯;食個簡單午餐,例如蒸粟米、蕃薯再加隻雞脾都好好,有澱粉質、蛋白質同高纖。

唯娛樂:
由於妹妹仲好細個,姐姐暫時唔可以一湊二落樓下玩;準備好唔使陪玩嘅玩具,例如點讀筆書、puzzle、STEAM玩具,如果姐姐唔得閒,唯b都可以自娛。同埋,唯爸放工就會返去帶佢落樓下放電。

午睡:
我返工前訓練咗妹妹自行入睡,所以而家佢飲完奶、掃好風,放佢落床會自己瞓,唔使氹瞓覺,咁姐姐起碼可以輕鬆啲。

大人晚餐:
如果等我放工先買,姐姐就會好趕,所以我每日放工後去買定第二日嘅餸,同埋買定急凍食物塞滿冰箱,咁姐姐就可以喺佢第二日得閒嘅時候整定餸(ftm嘅你會明白,一餐餸係要分開幾次準備)。

家務:
同姐姐講好,兩個小朋友係最緊要,要照顧好佢哋先,家務做唔晒都冇所謂;太麻煩嘅,例如洗雪櫃同抽油煙機呢啲,就等我放假睇住兩個,佢先做。

最後,如果唯b嗰朝要返暑假班,就帶埋佢去搭校車先返工。總之,我個人覺得,一個好嘅姐姐係幫手打長久戰,盡量避免佢太勞累,否則兩敗俱傷,佢太辛苦要走我又煩...同埋要佢帶兩個小朋友出入,都有啲危險,所以我哋盡量避免佢要周圍去(買餸/帶唯b去玩等等)。

希望幫到大家:)

Like our Facebook Page: https://www.facebook.com/weplaynlearn/

Follow us on Instagram: http://www.instagram.com/kly.chu

==============================

Text & Photos:唯媽

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到:[email protected] 我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

Share to Facebook