小朋友嘅善心感動媽媽 仲成立埋慈善組織?

小朋友嘅善心感動媽媽 仲成立埋慈善組織?

mami熱話
ByCircleon12 Aug 2019Digital Editor

「言教不如身教」,只要父母以身作則,仔女說可以喺自己身上得到良好嘅價值觀。近日一個美國媽媽就趁住暑假,帶同囡囡去買新鞋準備開學,誰不知因乖女一句童言無忌嘅說話,呢位媽媽一口氣買晒鋪頭嘅所有鞋子送畀有需要嘅人!

MamiDaily
Photo from MamiDaily

一位住喺美國阿肯色州嘅媽媽,早前帶著3個仔女去鞋店買鞋為開學做準備。佢9歲大嘅囡囡見到一對卡通鞋子嘅時候諗起自己嘅同學,就問媽媽:「可唔可以買埋呢對鞋畀我嘅同學仔啊?佢對鞋好細隻好窄,但負擔唔起一對新鞋嘅價錢。」

MamiDaily
Photo from MamiDaily

媽媽知道愛女一向好有愛心,佢聽到呢個請求覺得好感動,就話當然可以買啦,不過兩母女都唔知道同學仔嘅尺寸,媽媽就半搞笑同半認真咁問店員:「如果買晒呢度所有鞋要幾多錢啊?」本身呢位媽媽真係純粹問吓,但後來諗諗吓,就覺得點解唔真係買晒啲鞋,捐助畀有需要嘅人呢?最後呢位媽媽真係買晒鋪頭嘅鞋,用咗大約21,000美金買咗1,500對鞋,有齊晒唔同款式同尺寸,足足有95箱咁多!

後來呢位媽媽喺自己嘅社交平店分享咗呢個故事,喺社區上引嚟好大嘅迴響,有好多父母都話想幫手買鞋,仲有人直接捐款,希望呢位媽媽繼續幫助貧困嘅小朋友。而呢位媽媽近日仲收到唔少捐款,佢已經用呢筆善款買多咗200對鞋啦!

MamiDaily
Photo from MamiDaily

依家佢仲成立咗一個名為River Valley Kickstart嘅新組織,打算搞多幾次呢啲捐助活動,希望為社區內嘅小朋友提供更多有需要嘅開學物品,好似書包、校服等。好心有好報~ 希望呢位媽媽幫到更多有需要嘅人啦!

註:內文圖片為示意圖,並非涉事人。

Text:Mami Editorial

Share to Facebook